Rregulla të reja hyjnë në fuqi për transportin rrugor të udhëtarëve, duke shtuar detyrimet teknike për autobusët dhe duke kaluar një pjesë të procedurave në sistem elektronik.
Sipas ndryshimeve të miratuara, autobusët që kryejnë transport ndërqytetës duhet të pajisen me GPS, i cili do të transmetojë në mënyrë të pandërprerë të dhëna për vendndodhjen, shpejtësinë dhe kohën e udhëtimit drejt sistemit elektronik të monitorimit të autoritetit kompetent.
Një tjetër risi është krijimi i sistemit elektronik “e-Transport”, i cili do të administrojë procedurat dhe të dhënat për transportin ndërqytetës dhe do të ndërveprojë me portalin e-Albania.
Autobusët e certifikuar për operim në transportin rrugor duhet të kenë të instaluar edhe takograf digjital, ndërsa mjetet që transportojnë udhëtarë duhet të pajisen me sistem për transaksionin digjital të biletimit.
Pajisjet do të kontrollohen për gjendjen fizike, numrin e identifikimit dhe përputhjen me targën e autobusit. Mungesa e tyre, dëmtimi apo mospërputhja e të dhënave mund të sjellë refuzimin e aktvlerësimit për plotësimin e kushteve të komoditetit.
Ndryshimet vendosin edhe standarde të tjera për kushtet e udhëtimit. Autobusët e transportit brenda dhe jashtë vendit duhet të kenë sistem kondicionimi, qendër zëri dhe rrip sigurimi në çdo ndenjëse.
Për autobusët e linjave të rregullta ndërkombëtare kërkohet gjithashtu tualet funksional, i pajisur me WC, lavaman të vogël dhe solucion pastrimi.
Aktvlerësimi i kushteve të komoditetit do të lëshohet çdo vit, pasi autobusi të ketë kaluar me sukses kontrollin teknik të detyrueshëm dhe të ketë certifikatë teknike të vlefshme.
Me ndryshimet e reja, kontrolli i transportit ndërqytetës zhvendoset gjithnjë e më shumë drejt monitorimit elektronik të autobusëve, gjurmimit të lëvizjes së tyre dhe biletimit digjital. /skyweb.al
