Gjenerata Z po udhëheq ndryshimin në mënyrën se si udhëtarët zbulojnë, rezervojnë dhe ndajnë pushimet e tyre, ku pothuajse gjysma e tyre thonë se TikTok-u është burim frymëzimi për udhëtimet.
Në kohën time (jo shumë larg – jam vetëm një millennial), rekomandimet nga familjarët dhe miqtë, së bashku me një vlog në YouTube apo një shfletim në Pinterest, ishin burimet kryesore të frymëzimit për udhëtime. Por sa shumë kanë ndryshuar gjërat që atëherë!
Sot, videot e shkurtra në TikTok po ndikojnë gjithnjë e më shumë në zgjedhjen e destinacioneve dhe aktiviteteve jashtë vendit, veçanërisht te udhëtarët e Gjeneratës Z, të lindur mes viteve 1997 dhe 2012.
TUI Musement ka analizuar se si rrjetet sociale po ndikojnë në mënyrën se si udhëtarët sot zbulojnë destinacionet, rezervojnë, përjetojnë dhe ndajnë pushimet e tyre.
Në studimin e zhvilluar në Spanjë, Itali dhe Mbretërinë e Bashkuar, platforma globale për ture dhe aktivitete zbuloi se pothuajse gjysma (48%) e të anketuarve të Gjeneratës Z e cilësuan TikTok-un si një burim frymëzimi për udhëtimet. Kjo e vendos aplikacionin e rrjeteve sociale përpara rekomandimeve nga miqtë dhe familjarët, të cilat renditeshin në vend të dytë me 43%.
Sipas TUI Musement, kjo tregon se përmbajtja vizuale dhe videot e shkurtra po fitojnë gjithnjë e më shumë ndikim te udhëtarët që kërkojnë destinacione të reja për të vizituar, aktivitete për të provuar dhe ide për pushime.
Në përgjithësi, më shumë se katër në dhjetë udhëtarë (43%) thanë se një postim ose video virale i kishte shtyrë të rezervonin një udhëtim ose të merrnin pjesë në një aktivitet. Ky trend ishte veçanërisht i përhapur te millennials, me 52% të tyre që e pranuan këtë ndikim – pak më shumë se te Gjenerata Z, ku shifra ishte 50%.
Edhe influencerët rezultuan se kanë një ndikim të qartë. 43% e të anketuarve thanë se përmbajtja e krijuesve që ndjekin ndikon në vendimin se ku të udhëtojnë dhe çfarë të bëjnë jashtë vendit. Madje, 27% thanë se kishin ndryshuar destinacionin e tyre për shkak të rekomandimit të një influence-eri.
“Një imazh ose video e vetme tani mund të frymëzojë një udhëtim dhe ne kemi rritur vazhdimisht fokusin tonë te mënyra se si mund të arrijmë dhe angazhojmë më mirë audiencën përmes platformave si Instagram dhe TikTok”, tha Mirco Fiumene, Drejtor Menaxhues i Experiences & CMO në TUI Musement.
Por ndikimi i rrjeteve sociale nuk duket se përfundon pasi një person ka zgjedhur destinacionin dhe ka mbërritur atje.
Në epokën e “scroll”-imit, presioni për të realizuar foton perfekte të pushimeve ndikon edhe në mënyrën se si njerëzit i ndajnë përvojat e tyre. Më shumë se një e treta (37%) ndihen të detyruar t’i bëjnë udhëtimet e tyre të duken më emocionuese në profilet e tyre në rrjetet sociale. Te Gjenerata Z, kjo shifër rritet në pothuajse gjysmën, 45%.
Për disa, kërkimi për postimin perfekt mund të ndikojë edhe në aktivitetet që zgjedhin të bëjnë. Gati katër në dhjetë udhëtarë (39%) thanë se kishin vizituar një pikë turistike kryesisht për të bërë një foto ose për të regjistruar një video, ndërsa 37% thanë se, të paktën herë pas here, do të preferonin të shkonin në vende të famshme në Instagram sesa të zbulonin thesaret e fshehura dhe më pak të njohura të një destinacioni.
Pra, a ka ende rëndësi përvoja e pushimeve dhe vendi ku shkon, apo më shumë rëndësi ka se si do të duket ajo në “feed”-in e rrjeteve sociale pasi të mbërrish atje?
/skyweb.al
