Polonia po përballet me nivelin më të lartë të pasigurisë që nga fundi i Luftës së Dytë Botërore dhe ka nisur një program kombëtar për trajnimin e civilëve, me qëllim forcimin e rezistencës në raste krize apo konflikti. Qindra qytetarë po marrin pjesë në stërvitje praktike në bazat ushtarake, ku mësojnë përdorimin e maskave kundër gazit, orientimin në terren dhe aftësi mbijetese.
Programi synon të trajnojë rreth 400 mijë qytetarë deri në vitin 2027 dhe është vullnetar, i hapur nga nxënësit e shkollave e deri tek pensionistët. Ministri polak i Mbrojtjes, Władysław Kosiniak Kamysz, deklaroi se rreziku i një konflikti të ri në Europë është real dhe kërkon aftësi praktike nga çdo qytetar.
Agresioni i Rusisë ndaj Ukrainës, dronët që kanë hyrë në hapësirën ajrore polake dhe aktet e sabotimit të lidhura me inteligjencën ruse kanë detyruar Varshavën të rishikojë strategjinë e sigurisë. Polonia ka miratuar një projektbuxhet që rrit shpenzimet e mbrojtjes në 4.8% të PBB-së, shumë më lart se shumica e vendeve të NATO-s. Ndërkohë, është vendosur që ndërtesat e reja të pajisen me strehimore dhe ka nisur rikonstruksioni i atyre ekzistuese.
Në kufirin me Bjellorusinë dhe Kaliningradin ka nisur ndërtimi i “mburojës lindore”, një sistem i ri fortifikimesh dhe teknologjish mbrojtëse ndaj dronëve dhe ndërhyrjeve hibride.
Komandantë të ushtrisë polake pranojnë se lufta moderne i ka tejkaluar konceptet tradicionale. Gjenerali Roman Brudło tha se kërcënimet hibride – sabotime, dronë, sulme kibernetike dhe presioni përmes emigracionit të organizuar – janë mjeti kryesor me të cilin Rusia po teston kufijtë e NATO-s.
Forcat polake në kufirin me Bjellorusinë konsiderojnë migracionin e organizuar si një instrument të përdorur nga Moska dhe Minsku për të destabilizuar vendet e BE-së. Aktivistët e të drejtave të njeriut paralajmërojnë se kjo retorikë po shndërron refugjatët në objektiv politik dhe po zhduk debatet e dikurshme për trajtimin e tyre human.
Ndërkohë, komunitetet pranë kufirit me Kaliningradin shprehen të ndërgjegjësuar për rrezikun, por të mbrojtur nga NATO. Gjurmët e Luftës së Dytë Botërore në ndërtesat e zonës shërbejnë si kujtesë e dhimbshme për banorët më të moshuar, ndërsa brezi i ri po përgatitet për t’i shërbyer ushtrisë nëse lind nevoja.
Për qytetarë si Cezary Pruszko, rikthimi i trajnimeve të mbrojtjes civile është një nevojë e qartë. Ai thotë se dëshiron që punonjësit e tij – një brez i rritur në kohë paqeje – të dinë si të reagojnë në rast të një emergjence.
“Nuk dua që t’i përdorim ndonjëherë këto aftësi,” thotë ai, “por është më mirë të jesh gati, sesa i papërgatitur.” /The Guardian
