Agjencia Shtetërore e Kadastrës (ASHK) ka rikujtuar qytetarët se kartela e pasurisë dhe harta kadastrale mund të rifreskohen në çdo kohë online, përmes një aplikimi të vetëm në portalin e-Albania.
Sipas ASHK-së, kartela e pasurisë përmban të dhënat kryesore juridike dhe teknike të pronës, përfshirë emrin e pronarit ose bashkëpronarëve, numrin e pasurisë, volumin dhe faqen, zonën kadastrale, si dhe informacione të tjera që lidhen me të.
Ndërkohë, harta kadastrale paraqet grafikisht pronën, duke treguar kufijtë, sipërfaqen dhe pozicionin e saj në zonën përkatëse kadastrale.
Për të përfituar dokumentet e përditësuara, qytetarët duhet të hyjnë në e-Albania dhe të zgjedhin shërbimin “Aplikim për lëshim kopje kartele të pasurisë”.
ASHK sqaron se, me përzgjedhjen e këtij shërbimi, sistemi aktivizon automatikisht edhe aplikimin për “lëshim kopje të fragmentit të hartës kadastrale”, duke bërë të mundur marrjen e të dy dokumenteve nëpërmjet së njëjtës procedurë.
Më pas aplikanti duhet të zgjedhë pasurinë përkatëse, të plotësojë formularin elektronik dhe të dërgojë kërkesën.
Pas aplikimit duhet të kryhet edhe pagesa e tarifës përkatëse, e cila mund të bëhet online, pranë bankave ose përmes postës.
Agjencia Shtetërore e Kadastrës bën të ditur se qytetarët që kanë nevojë për dokumentacionin në një afat më të shkurtër mund të zgjedhin edhe procedurën e përshpejtuar.
Në këtë rast duhet të përzgjidhet shërbimi përkatës që mban kodin “PP” përpara emërtimit të tij. /skyweb.al
