“Vendimi merret në gjashtë minuta dhe gjykohet për gjashtë muaj”, shkruan ish-drejtuesi i shërbimit zjarrfikës, duke kritikuar mënyrën se si matet menaxhimi i emergjencave nga zjarret.
Ish-kreu i Zjarrfikësve, Arben Cara, ka reaguar me një analizë të gjatë mbi mënyrën e drejtimit të operacioneve kundër zjarreve, duke theksuar se rezultati nuk varet vetëm nga numri i mjeteve, sasia e ujit apo ndërhyrjet nga ajri.
“Zjarri nuk barazohet me ujë dhe mjete. Të mendosh kështu është një doktrinë që të çon drejt vendimeve të gabuara”, shkruan Cara.
Sipas tij, pas çdo zjarri të madh pyetja kryesore është se sa zjarrfikëse, avionë apo helikopterë u angazhuan, ndërsa rrallë analizohet se çfarë vendimesh u morën në minutat e para kritike.
Cara thotë se gjatë karrierës së tij ka parë zjarre të mëdha të humbura me 20 automjete në terren dhe të tjera të kontrolluara me vetëm pesë. Sipas tij, ndryshimin e ka bërë aftësia për të parashikuar që në orën e parë se ku do të ndodhej zjarri disa orë më vonë.
Ish-kreu i Zjarrfikësve thekson se avionët dhe helikopterët nuk mund ta shuajnë të vetëm një zjarr të madh. Ata ngadalësojnë përhapjen, ftohin frontin dhe u japin kohë ekipeve, por ndërhyrja duhet të përfundojë nga zjarrfikësit në tokë.
“Nëse pas hedhjes nuk ka ekip që e konsolidon menjëherë zonën, uji avullon dhe zjarri mund të rikthehet”, paralajmëron ai.
Cara tërheq vëmendjen edhe për djegien pa flakë, e cila mund të vazhdojë në shtresën e humusit, në rrënjë, trungje të zbrazëta dhe grumbuj gjethesh. Largimi i ekipeve sapo ulen flakët, pa përfunduar ftohja dhe kontrolli i perimetrit, mund të sjellë riaktivizimin e zjarrit.
Në analizën e tij, ai rendit nëntë parime për komandantët e operacioneve: parashikimin e përhapjes së zjarrit, marrjen në kohë të vendimeve, shkurtimin e hierarkisë, ngritjen e strukturës së komandimit që në orën e parë, përshtatjen e strategjisë dhe garantimin e sigurisë së ekipeve.
Sipas Carës, jeta e zjarrfikësve dhe e popullsisë duhet të jetë mbi çdo objektiv tjetër. Ai thekson se tërheqja e ekipeve dhe evakuimi i banorëve nuk janë dështim, por vendime që tregojnë kompetencë profesionale.
“Ne investojmë miliona në kapacitetin për të reaguar, por shumë më pak në kapacitetin për të vendosur. Çdo verë bëjmë të njëjtën zgjedhje dhe çdo shtator e paguajmë”, shkruan ai.
Reagimi vjen pas largimit të Carës nga drejtimi i shërbimit zjarrfikës.
Skyweb.al zbuloi më herët se ai nuk kishte dhënë dorëheqjen, siç ishte raportuar fillimisht, por ishte shkarkuar nga ministri i Brendshëm, Besfort Lamallari.
“Zjarri luftohet nga vendimi i duhur, në kohën e duhur, nga njeriu i duhur”, përfundon ish-kreu i Zjarrfikësve.
