Agjencia Shtetërore e Kadastrës ka publikuar dokumentacionin që duhet të paraqesin qytetarët për regjistrimin e tokës së përfituar me Aktin e Marrjes së Tokës në Pronësi, i njohur si AMTP.
Përpara aplikimit, qytetarët duhet të sigurojnë aktin origjinal të AMTP-së dhe planin e rilevimit të sipërfaqes së përfituar, të hartuar sipas standardit të miratuar me vendim të Këshillit të Ministrave.
Pjesë e dosjes duhet të jetë edhe certifikata e gjendjes familjare. Për familjet përfituese nga ish-kooperativat bujqësore kërkohet certifikata e datës 1 gusht 1991 dhe ajo e momentit të regjistrimit.
Për familjet që kanë përfituar tokë nga ish-ndërmarrjet bujqësore duhet të paraqitet certifikata familjare e 1 gushtit 1991, së bashku me ndryshimet e ndodhura deri më 1 tetor 1992, si edhe dokumenti i gjendjes familjare në momentin e regjistrimit.
Në rastet kur familja ka përfituar tokë, pronësia e së cilës është hequr më parë, kërkohet vërtetim, akt ose dokument zyrtar mbi pronësinë e tokës përpara vitit 1946. Kur është e nevojshme, duhet të dorëzohet edhe dëshmia e trashëgimisë.
Qytetarët duhet të paraqesin gjithashtu vërtetimin e pagesës së taksave vendore.
Kadastra sqaron se aplikuesi nuk duhet të ketë përfituar tokë bujqësore në territorin e një ish-kooperative ose ish-ndërmarrjeje tjetër bujqësore, të ndryshme nga ajo ku ndodhet prona për të cilën kërkohet regjistrimi.
Pas aplikimit, drejtoria vendore e Kadastrës kryen verifikimet për të vlerësuar mundësinë e regjistrimit të pronës, duke u mbështetur në dokumentacionin ekzistues dhe gjendjen faktike në terren.
Dokumentet duhet të ngarkohen në formatin PDF gjatë aplikimit, ndërsa kopjet origjinale duhet të dërgohen me postë pranë drejtorisë vendore përkatëse të Kadastrës.
