Agjencia e Trajtimit të Pronave njofton se, duke nisur nga muaji shtator, do të vijojë me nxjerrjen e vendimeve për kërkesat për njohjen e pronësisë.
Sipas ATP-së, një numër i konsiderueshëm dosjesh rezultojnë ende me dokumentacion të paplotë, pavarësisht njoftimeve që u janë dërguar subjekteve për plotësimin e tij.
Agjencia paralajmëron se mungesa e dokumentacionit të kërkuar mund të sjellë përfundimin e shqyrtimit të dosjes me vendim për mosnjohjen e pronësisë ose rrëzimin e kërkesës.
Për këtë arsye, qytetarëve u kërkohet të verifikojnë dhe të plotësojnë sa më parë dokumentacionin përkatës, në mënyrë që kërkesat e tyre të shqyrtohen të plota.
ATP sqaron gjithashtu se çdo subjekt ka të drejtë të ankimojë vendimin, sipas procedurave dhe afateve të parashikuara në legjislacionin në fuqi.
