Drejtësia franceze ka refuzuar kërkesën për ndryshimin e masës së sigurisë ndaj biznesmenit shqiptar Ermal Beqiri, rreth një muaj pas arrestimit të tij.
Beqiri kërkoi të enjten zëvendësimin e paraburgimit me një masë më të lehtë, por gjykata vendosi të mos e pranojë kërkesën. Sipas argumentimit të saj, burimet e konsiderueshme financiare të biznesmenit, si edhe licenca e pilotit, mund t’i mundësonin atij t’u shmangej shpejt autoriteteve.
Avokati i Beqirit e cilësoi ndalimin e klientit të tij si “të paligjshëm”. Sipas mbrojtjes, Beqiri kishte mësuar nga mediat shqiptare se ishte shpallur në kërkim nga autoritetet dhe, përpara incidentit me avionin privat më 27 korrik, kishte informuar autoritetet franceze për situatën. Argumentet e mbrojtjes nuk bindën gjykatën.
Para drejtësisë franceze, Beqiri tha se nuk kishte zgjedhur vendin më të mirë për t’u fshehur. Ai deklaroi se ka një lidhje të fortë me Francën, ku kishte mbërritur që në moshën 16-vjeçare.
“Arrita në Francë në moshën 16 vjeç, kam familjen time të dytë këtu. Po, lëviz shumë, në Turqi, Slloveni, Francë… Mund të kisha shkuar kudo, madje edhe në Dubai, por e dua Francën. Edhe nëse nuk zgjodha vendin më të mirë për t’u fshehur, as më të mirin për taksat…”, mësohet të ketë deklaruar ai.
Beqiri është shpallur në kërkim nga SPAK, i cili ka kërkuar ekstradimin e tij në Shqipëri në kuadër të hetimeve për çështjen e tenderëve të AKSHI-t.
Sipas hetimeve, autoritetet shqiptare dyshohet se kanë identifikuar pasuri dhe llogari bankare në vlerë të konsiderueshme, përfshirë llogari me një total prej më shumë se 2 milionë eurosh, dy apartamente, një avion privat, automjete, si dhe një kështjellë në Francën veriore, me vlerë të përllogaritur rreth 2.6 milionë euro.
SPAK ka ngritur ndaj Beqirit një sërë akuzash, mes tyre heqjen e paligjshme të lirisë, konkurrencën e paligjshme, kryerjen e veprave penale nga organizata kriminale dhe grupi i strukturuar kriminal, si dhe pastrimin e parave.
Biznesmeni u arrestua në Francë pasi fluturoi me avionin e tij privat në lartësi të ulët mbi centralin bërthamor të Penly. Para autoriteteve franceze, Beqiri deklaroi se kishte gabuar në përcaktimin e lartësisë së fluturimit dhe se, në momentin kur kaloi mbi central, ishte duke folur në telefon me nënën e tij.
Për incidentin ajror, ai u dënua me 7 mijë euro gjobë. Ndërkohë, Beqiri vijon të mbahet në paraburgim në Francë, në pritje të zhvillimit të procedurave për ekstradimin e tij drejt Shqipërisë.
