Arrestimi i Ergys Agasit në Elbasan ka nxjerrë në sipërfaqe lidhjet e tij me ish-drejtues të Policisë së Shtetit.
Në momentin e kapjes, sipas infonews.al, në drejtimin e automjetit me të cilin udhëtonte Agasi ishte pikërisht Uljan Shpataraku, ish-zyrtar i lartë policie dhe një nga njerëzit më të besuar të ish-drejtorit të Përgjithshëm, Ilir Proda.
Ky fakt përforcon dyshimet se Agasi nuk ishte larguar asnjëherë nga Shqipëria dhe se gjatë muajve në kërkim ka qëndruar i fshehur në Elbasan, zonë ku Proda dhe Shpataraku ushtruan për vite me radhë funksione të rëndësishme policore.
Ilir Proda ishte përfolur publikisht si një “emërim” i Ergys Agasit në krye të Policisë së Shtetit. Lidhja e tij me Shpatarakun ishte e njohur. Sapo u emërua Drejtor i Përgjithshëm, në tetor 2024, Proda ia besoi atij drejtimin e Policisë së Elbasanit. Në shkurt 2025 e transferoi në Drejtorinë e Përgjithshme, ndërsa më pas tentoi ta vendoste në krye të Policisë së Korçës.
Proda i hapi Shpatarakut rrugën drejt posteve të larta, pavarësisht se ky i fundit ishte pezulluar dhe proceduar më herët për mosarrestimin dhe lirimin e një personi të shpallur në kërkim.
Për njeriun e tij të besuar, ish-kryepolici i “vuri minat” strukturës së Policisë së Shtetit, duke e promovuar dhe mbajtur në poste të rëndësishme.
Por situata ndryshoi pas shkarkimit të Ilir Prodës më 1 mars 2026. Vetëm tri ditë më vonë, drejtori i komanduar Sokol Bizhga pezulloi Uljan Shpatarakun për moszbatim të detyrimeve funksionale dhe mosparaqitje të rregullt në punë. Më 20 maj, drejtori i ri Skënder Hita e largoi përfundimisht nga radhët e Policisë së Shtetit.
Pas ardhjes së Hitës nisi edhe çmontimi i kupolës së ngritur gjatë drejtimit të Prodës. Në fund të korrikut u largua nga drejtimi i Departamentit të Policisë Kriminale Neritan Nallbati, ndërsa në vendin e tij u komandua Arjan Muça.
Megjithatë, në poste të rëndësishme vazhdojnë të qëndrojnë drejtues të përfolur për lidhje me Ergys Agasin. Një prej tyre është drejtoresha e Hetimit të Krimit Kibernetik, Ervina Gjana.
Gjatë hetimeve, SPAK i sekuestroi asaj celularin, tetë telefona të tjerë dhe dy laptopë që i përkisnin edhe bashkëshortit të saj, Renato Hristic, i njohur si shoqërues i Agasit.
Kronologjia e ngjarjeve tregon se largimi i Prodës dhe goditja e njerëzve të tij brenda Policisë i hapën rrugën lokalizimit të Ergys Agasit. Për muaj me radhë, një nga personat më të kërkuar nga SPAK duket se qëndroi në Shqipëri nën mbrojtjen e policisë, ndërsa masa “arrest në burg” mbeti e paekzekutuar, deri sot. /skyweb.al
