Një problem teknik i përkohshëm në sistemin e monitorimit të trafikut ajror të Albcontrol ka shkaktuar pezullimin për pak minuta të fluturimeve në hapësirën ajrore shqiptare.
Pavarësisht se situata e krijuar nuk lidhet me të, Aeroporti Ndërkombëtar i Tiranës njoftoi se ndërprerja u bë si masë sigurie dhe u shoqërua me vonesa e ndryshime në oraret e fluturimeve.
Sipas TIA-s, problematika u adresua menjëherë, ndërsa po punohet për rikthimin sa më të shpejtë të operacioneve në normalitet.
Aeroporti bëri të ditur se është në kontakt të vazhdueshëm me autoritetet përkatëse dhe kompanitë ajrore, ndërkohë që po menaxhon pasagjerët e prekur nga ndryshimet e orareve.
“TIA ka angazhuar numrin maksimal të stafit në dispozicion për të mbështetur operacionet në terminal dhe për të garantuar menaxhimin sa më të shpejtë të situatës”, thuhet në njoftim. Ekipet e aeroportit janë në gatishmëri të plotë për të përshpejtuar normalizimin e operacioneve.
Pasagjerëve u kërkohet të kontrollojnë rregullisht njoftimet dhe komunikimet e kompanive të tyre ajrore për informacionin më të fundit mbi statusin e fluturimeve. /skyweb.al
