Transplantet e feçeve, të cilat ndryshojnë përbërjen e baktereve në zorrë, mund të lehtësojnë alergjitë e rënda ndaj kikirikëve te disa pacientë, sugjeron një studim pilot, shkruan Reuters.
Studiuesit përfshinë në studim 10 të rinj me alergji të rënda ndaj kikirikëve, të cilët reagonin edhe ndaj sasive shumë të vogla të kikirikëve. Ata u dhanë pjesëmarrësve të gëlltisnin kapsula të ngrira me feçe që përmbanin edhe lloje bakteresh të dobishme të marra nga dhurues me mikrobiomë të shëndetshme të zorrëve. Tre muaj më vonë, tre prej pjesëmarrësve mund të toleronin të hanin disa kikirikë, raportuan studiuesit në revistën Science Translational Medicine.
Në fazën tjetër të studimit, pesë vullnetarë të tjerë morën antibiotikë përpara transplantit të feçeve, për të parë nëse bakteret nga dhuruesit do të transferoheshin më me sukses kur të mos duhej të konkurronin me mikrobet që tashmë jetonin në zorrët e pjesëmarrësve.
Tre nga pesë pjesëmarrësit treguan përmirësim në tolerancën ndaj kikirikëve dhe mundën të konsumonin më shumë se katër kikirikë përpara se të shfaqnin një reaksion. Kjo sugjeroi se antibiotikët mund të rrisnin efikasitetin e transferimit të mikrobiomës.
Analizat e gjakut treguan se personat që iu përgjigjën trajtimit kishin nivele më të larta të të ashtuquajturave kripëra biliare, të cilat ndihmojnë zorrën e hollë të shpërbëjë yndyrnat për një përthithje më të mirë. Bakteret e dobishme të marra përmes transplantit të feçeve dukej se ishin më të afta për përpunimin e kripërave biliare sesa bakteret që gjendeshin fillimisht te pjesëmarrësit me alergji.
Në eksperimente të tjera, ekipi zbuloi gjithashtu se, duke ndihmuar në përpunimin e kripërave biliare, bakteret e dobishme rrisnin nivelet e qelizave imunitare që ndihmojnë në mbrojtjen e organizmit nga reaksionet alergjike.
“Ky studim novator ishte i pari që tregoi se një terapi e bazuar në mikrobiomë mund të përmirësojë alergjitë ushqimore te njerëzit, duke zbuluar gjithashtu se si bakteret e zorrëve, metabolitët e tyre dhe sistemi imunitar bashkëveprojnë për të ndikuar në përgjigjen ndaj trajtimit”, tha drejtuesja e studimit, Dr. Rima Rachid nga Boston Children’s Hospital, në një deklaratë.
“Studime më të mëdha mbi transplantin e feçeve dhe transplantin e mikrobiotës janë tashmë të domosdoshme për të konfirmuar këto gjetje, për të identifikuar pacientët që kanë më shumë gjasa të përfitojnë dhe për të zbuluar bakteret e dobishme që mund të zhvillohen në terapi probiotike të synuara për alergjitë ushqimore”, tha ajo.
