Një problem teknik në sistemet e Albcontrol preku pasditen e sotme trafikun ajror në hapësirën shqiptare, kryesisht fluturimet tranzit.
Ndërprerja ndodhi rreth orës 17:30, ndërsa në orën 18:00 ishte rikthyer në funksionim normal 90% e sistemeve, sipas njoftimit zyrtar.
Problemi preku sistemet e kontrollit të hapësirës ajrore, jo ato të Aeroportit Ndërkombëtar të Tiranës. Në TIA, situata u menaxhua në mënyrë të organizuar për pasagjerët që prisnin të niseshin.
Albcontrol njoftoi se ekipet teknike ndërhynë menjëherë për të garantuar sigurinë e avionëve dhe për të rikthyer sistemet në punë.
“Ekspertët e Albcontrol kanë marrë të gjitha masat për të shmangur çdo rrezik për avionët në hapësirën ajrore dhe janë angazhuar për rikthimin e sistemeve në punë”, thuhet në njoftim.
Ndërkohë, gjatë periudhës së problemit teknik në Shqipëri, avionët tranzit nisën të shmangbin hapësirën ajrore shqiptare duke vijuar direkt nga Greqia në Itali ose anasjelltas, nderkohë qe të tjerë avionë u lidhën me kontrollin ajror të Kosovës ose Malit të Zi duke shmangur çdo rrezik.
Sipas Albcontrol, reagimi i shpejtë dhe profesionalizmi i ekipeve shmangën bllokimin e trafikut ajror në hapësirën shqiptare.
Në momentin e njoftimit, vijonte puna për rikthimin e pjesës së mbetur të sistemeve. /skyweb.al
