Kapiteneria e Portit të Durrësit ka ndaluar më 28 gusht hyrjen në radën e portit të tankerit Hanuman , një anije që lundron nën flamurin e Sierra Leones dhe që nga Inteligjenca e Mbrojtjes së Ukrainës, GUR, është listuar si pjesë e së ashtuquajturës “flotë hije” ruse.
Sipas të dhënave të deklaruara për lundrimin, tankeri rezulton se është nisur nga Porti Yalova në Turqi, ndërsa si destinacion ka deklaruar Portin e Durrësit. Ky element ngre pikëpyetje të drejtpërdrejta mbi natyrën, origjinën dhe destinacionin përfundimtar të ngarkesës që ndodhej në bord.
Tankeri me numër IMO 9295048 rezulton i përfshirë, sipas databazës së GUR, në transportin e naftës dhe produkteve ruse të naftës në kundërshtim me kufizimet e vendosura nga G7 dhe Bashkimi Europian, si dhe me mekanizmin e kufirit maksimal të çmimit, të njohur si “price cap”.
Fakti që “Hanuman” kishte deklaruar Durrësin si destinacion final e bën rastin edhe më të ndjeshëm për Shqipërinë. Deri më tani nuk janë bërë publike të dhëna të plota mbi sasinë e ngarkesës që anija mbante në këtë udhëtim dhe as mbi origjinën konkrete të produktit në bord.
Sipas të dhënave të publikuara nga inteligjenca ukrainase, në shtator të vitit 2025 kjo anije ka transportuar më shumë se 30 mijë tonë produkte nafte ruse nga porti i Novorossiysk drejt Turqisë.
GUR evidenton gjithashtu raste kur “Hanuman” ka fikur sistemin automatik të identifikimit AIS, si dhe hyrje të saj në porte ruse. Në historikun e lëvizjeve të publikuara nga shërbimi ukrainas figuron edhe Durrësi mes porteve të vizituara më herët nga anija.
Vendimi i Kapitenerisë për të mos lejuar hyrjen e tankerit vjen në një moment kur vendet perëndimore kanë shtuar kontrollet ndaj anijeve të lidhura me të ashtuquajturën “flotë hije” ruse, e përdorur për transportin e naftës jashtë kanaleve tradicionale dhe nën një nivel më të ulët transparence.
Në mungesë të një sqarimi zyrtar mbi ngarkesën konkrete që “Hanuman” po sillte nga Yalova drejt Durrësit, mbetet e paqartë nëse bëhej fjalë për naftë me origjinë ruse apo për një produkt tjetër.
Megjithatë, fakti që destinacioni i deklaruar ishte Porti i Durrësit dhe se anija figuron në databazat ukrainase si pjesë e “flotës hije” ruse e bën rastin një çështje që kërkon transparencë të plotë mbi ngarkesën, pronësinë dhe origjinën e saj. /skyweb.al
