Qeveria ka hartuar një projektligj të ri për shërbimet e kujdesit social, i cili zgjeron ndjeshëm përgjegjësitë financiare dhe administrative të bashkive.
Njësitë vendore do të duhet të identifikojnë nevojat sociale, të hartojnë planet vendore, të organizojnë shërbimet dhe të garantojnë vazhdimësinë e tyre. Çdo bashki duhet të krijojë dhe administrojë Fondin Social Vendor, përmes të cilit do të financohen shërbimet ekzistuese dhe ato të reja.
Projektligji parashikon zgjerimin e kujdesit në familje dhe komunitet, shërbimet lëvizëse, kujdesin afatgjatë dhe reduktimin gradual të qendrave rezidenciale.
Financimi do të përcaktohet sipas llojit të shërbimit, standardeve, kostos për njësi dhe nivelit të nevojave të përfituesve. Por relacioni nuk jep asnjë përllogaritje konkrete për koston e reformës apo fondet shtesë që do t’u duhen bashkive.
Dokumenti mjaftohet të thotë se shpenzimet do të përballohen nga ministria, njësitë vendore dhe programet përkatëse buxhetore.
Kjo lë të paqartë nëse bashkitë do të marrin financim shtesë apo do t’i mbulojnë detyrimet e reja me buxhetet aktuale. Projektligji shfuqizon ligjin nr. 121/2016, ndërsa ofruesve ekzistues u jep 12 muaj kohë për t’u përshtatur me kriteret e reja. /skyweb.al
