Pagat e muajit gusht për magjistratët dhe punonjësit e sistemit të drejtësisë në Shqipëri vijojnë të mbeten të bllokuara në Thesarin e Shtetit, pas urdhrit të qeverisë.
Kryeministri Edi Rama ka publikuar në profilin e tij në rrjetet sociale një pjesë nga konferenca e Ministrit të Drejtësisë, Toni Gogu, të cilën e ka shoqëruar me mesazhin: “Secili institucion në vendin e vet”.
Në reagimin e tij, Rama thekson se për plotësimin e boshllëkut ligjor, në zbatim të vendimit të Gjykatës Kushtetuese për pagat e sistemit të drejtësisë, ndërhyrja duhet të bëhet përmes një vendimi të Kuvendit dhe jo nga vetë Gjykata.
“Secili institucion në vendin e vet. Fondin e pagave të pushtetit gjyqësor e propozon pushteti ekzekutiv dhe e miraton pushteti legjislativ”, shkruan Rama.
Më tej, kryeministri argumenton se, nëse Gjykata Kushtetuese pret që Parlamenti të ekzekutojë vendimin e saj për pagat e gjyqësorit dhe nuk ndërhyn vetë për të hapur fondet në Thesarin e Shtetit, atëherë çdo koment tjetër për këtë çështje është, sipas tij, i panevojshëm.
“E kur vetë Gjykata Kushtetuese pret parlamentin të ekzekutojë vendimin e saj për pagat e gjyqësorit dhe nuk kuturiset të hapë vetë derën e Thesarit të Shtetit, çdo koment tjetër është në rastin më të mirë humbje kohe dhe në më të keqin as mos e pyet se ç’është…”, përfundon Rama.
