Qeveria po shtyn përpara idenë e krijimit të një shteti sovran bektashi brenda Tiranës, por, ende pa marrë formë juridike ky projekt, është kujdesur që Kryegjyshata Botërore Bektashiane të kompensohet edhe për tokat e saj të zëna nga ndërtimet e legalizuara.
Këshilli i Ministrave ka miratuar disa ditë me4 parë kompensimin financiar të pronarëve të tokave mbi të cilat janë ngritur ndërtime informale që më pas janë legalizuar.
Në listën e përfituesve, Kryegjyshata Botërore Bektashiane shfaqet në disa raste për prona në Tiranë, Sarandë dhe Gjirokastër. Nga mbledhja e shumave të përcaktuara në vendim, ajo përfiton në total rreth 20.3 milionë lekë.
Vetëm katër prej kompensimeve më të mëdha janë:
- 7.53 milionë lekë për 240.7 metra katrorë në Tiranë;
- 5.08 milionë lekë për 162.5 metra katrorë në Tiranë;
- 3.95 milionë lekë për 126.47 metra katrorë;
- 2.29 milionë lekë për 73.11 metra katrorë.
Pjesa tjetër e shumës përbëhet nga disa kompensime më të vogla për prona të tjera të Kryegjyshatës të përfshira në listën e miratuar nga qeveria.
Kompensimi vjen në një moment kur projekti i kryeministrit Edi Rama për krijimin e një enklave sovrane bektashiane në Tiranë raportohet se ka hyrë në një fazë më konkrete përgatitore. Nisma, e krahasuar me modelin e Vatikanit, kërkon miratim parlamentar dhe ndryshime ligjore përpara se të realizohet.
Në total, qeveria ka miratuar 840.7 milionë lekë kompensim për pronarët e 61,477 metrave katrorë tokë të zënë nga ndërtime të legalizuara. Lista përfshin 253 raste legalizimi, 328 pasuri dhe rreth 1,901 pronarë ose bashkëpronarë në disa qytete të vendit.
Paratë do të sigurohen edhe nga të ardhurat që Agjencia Shtetërore e Kadastrës arkëton nga shitja e parcelave ndërtimore personave që kanë legalizuar objektet.
