Tensionet në Lindjen e Mesme kanë shkaktuar një tjetër rritje të çmimeve të naftës në tregjet ndërkombëtare, duke shtuar presionin mbi konsumatorët shqiptarë. Barra e lartë e taksave dhe tarifave që përfshihen në çdo litër karburant rrezikon ta bëjë situatën gjithnjë e më të papërballueshme.
Kontratat e naftës Brent u rritën sot me mbi 2%, duke arritur në 106.72 dollarë për fuçi, ndërsa nafta amerikane WTI u tregtua me 102.15 dollarë. Gjatë tregtimit, Brent iu afrua nivelit 108 dollarë për fuçi.
Rritja lidhet me sulmet e reja ndaj infrastrukturës energjetike të Arabisë Saudite, mbylljen e përkohshme të naftësjellësit Lindje–Perëndim dhe shtimin e rrezikut për transportin përmes Ngushticës së Hormuzit dhe Bab el-Mandebit.
Mbyllja e tubacionit saudit kërcënon deri në 4% të furnizimit botëror me naftë, ndërsa vetëm gjatë javës së kaluar çmimet ndërkombëtare u rritën rreth 8%.
Goditja pritet të transmetohet edhe në tregun shqiptar, ku nafta po tregtohet deri në 229 lekë për litër dhe benzina deri në 219 lekë. Çmimi i naftës në vend është rritur rreth 30% krahasuar me muajin qershor.
Për konsumatorët shqiptarë, shtrenjtimi ndërkombëtar bëhet edhe më i rëndë për shkak të taksave dhe tarifave të shumta të përfshira në çmimin përfundimtar: akciza, taksa e qarkullimit, taksa e karbonit, TVSH-ja dhe tarifa të tjera.
Veçanërisht TVSH-ja, e llogaritur edhe mbi taksat e tjera, bën që çdo rritje e çmimit bazë të naftës të sjellë automatikisht më shumë të ardhura për buxhetin, por edhe një faturë më të lartë për qytetarët dhe bizneset.
Nëse tensionet në Lindjen e Mesme vazhdojnë dhe çmimet në bursë mbeten mbi 100 dollarë për fuçi, Shqipëria rrezikon një tjetër valë shtrenjtimi të transportit, ushqimeve dhe mallrave të konsumit./skyweb.al
