Sigurimi i një banese po bëhet gjithnjë e më i vështirë për të rinjtë shqiptarë, ndërsa shumica vazhdojnë të jetojnë në shtëpinë e prindërve edhe pas moshës 25 vjeç.
Sipas të dhënave më të fundit të disponueshme nga Eurostat, 65.6% e shqiptarëve të moshës 25–34 vjeç jetonin me prindërit në vitin 2023. Pra, gati dy në çdo tre të rinj nuk kishin arritur të krijonin një banesë të pavarur.
Shqipëria qëndron shumë mbi mesataren e Bashkimit Europian, e cila në të njëjtin vit ishte 30%.
Të dhënat tregojnë se gjendja është përkeqësuar gjatë viteve. Në vitin 2017 përqindja në Shqipëri ishte 60.2%, ndërsa në vitin 2023 arriti në 65.6%, duke u rritur me 5.4 pikë përqindjeje, ndërsa shtrenjtimi i apartamenteve gjatë periudhës 2024-2026 pritet t’i përkeqësojë edhe më tepër treguesit, raporton skyweb.al.
Një nga pengesat kryesore për të rinjtë mbetet çmimi i banesave, i cili ka vazhduar të rritet ndjeshëm edhe pas vitit 2023, periudha së cilës i përkasin të dhënat e Eurostat-it.
Banka e Shqipërisë raporton se në gjashtëmujorin e dytë të vitit 2025, indeksi i çmimeve të banesave në rang vendi u rrit me 28% krahasuar me një vit më parë dhe me 11.7% kundrejt gjashtëmujorit paraardhës. Rritja më e fortë erdhi nga zonat bregdetare.
Edhe në Tiranë, ku është përqendruar pjesa më e madhe e kërkesës për strehim, çmimet u rritën me 4.4% në një vit. Agjentët e pasurive raportuan gjithashtu rritje të qirave dhe parashikuan që shtrenjtimi i banesave të vazhdonte.
Me çmimet dhe qiratë që kanë vazhduar të rriten, ndërsa blerja e një apartamenti kërkon të ardhura dhe kredi gjithnjë e më të mëdha, shifrat e ardhshme për të rinjtë që jetojnë me prindërit mund të rezultojnë edhe më të përkeqësuara. /skyweb.al
