Shqipëria është renditur ndër dhjetë destinacionet kryesore jashtë Bashkimit Europian të zgjedhura nga rezidentët e vendeve të BE-së për udhëtime personale.
Sipas të dhënave të Eurostat për vitin 2024, drejt Shqipërisë u regjistruan rreth 2 milionë udhëtime me të paktën një natë qëndrimi, të barabarta me 2% të totalit të udhëtimeve jashtë unionit.
Me këtë rezultat, Shqipëria u rendit në vendin e nëntë, duke lënë pas Bosnjë-Hercegovinën, e cila regjistroi 1.6 milionë udhëtime dhe gjithashtu një peshë prej 2%.
Destinacioni më i preferuar ishte Mbretëria e Bashkuar, me 14.4 milionë udhëtime ose 18% të totalit. Në vendin e dytë u rendit Turqia, me 8.8 milionë udhëtime dhe 11% të totalit.
Shtetet e Bashkuara zunë vendin e tretë, me 6 milionë udhëtime, ndërsa Zvicra u rendit e katërta me 5.9 milionë. Të dyja destinacionet përfaqësuan nga 7% të udhëtimeve jashtë BE-së.
Norvegjia regjistroi 5.2 milionë udhëtime ose 6% të totalit, e ndjekur nga Egjipti me 4.4 milionë dhe Maroku me 3.6 milionë.
Në vendin e tetë u rendit Tajlanda, me 2.5 milionë udhëtime dhe 3% të totalit, ndërsa dhjetëshja u plotësua nga Shqipëria dhe Bosnjë-Hercegovina.
Të dhënat përfshijnë udhëtimet e rezidentëve të BE-së për arsye personale jashtë territorit të unionit, me kohëzgjatje të paktën një natë. Shifrat tregojnë numrin e udhëtimeve dhe jo numrin e turistëve unikë.
Renditja e Shqipërisë në dhjetëshen kryesore konfirmon rritjen e saj si destinacion turistik për tregun europian, përkrah vendeve me traditë shumë më të konsoliduar në turizmin ndërkombëtar./skyweb.al
