Administratori i shoqërisë “ECO-ELB” sh.a., Leli Kaja, është arrestuar në flagrancë këtë të hënë në Elbasan, në një operacion të Byrosë Kombëtare të Hetimit, nën drejtimin e SPAK-ut.
Sipas Prokurorisë së Posaçme, Kaja dyshohet se i ka kërkuar dhe marrë 400 mijë lekë administratorit të një operatori ekonomik, në këmbim të moskryerjes së detyrave që i ngarkon ligji në funksionin e tij.
Gjatë kontrollit personal, hetuesit i kanë gjetur dhe sekuestruar shumën e dyshuar si përfitim të paligjshëm.
Arrestimi është kryer në kuadër të procedimit penal nr. 108 të vitit 2026, të regjistruar më 1 tetor mbi bazën e një referimi të BKH-së. Gjatë hetimit janë përdorur metoda speciale dhe veprime të simuluara.
Kaja dyshohet për veprën penale “Korrupsioni pasiv i personave që ushtrojnë funksione publike”, të parashikuar nga neni 259, paragrafi 2, i Kodit Penal.
SPAK njofton se hetimet vijojnë për zbardhjen e plotë të rrethanave dhe identifikimin e personave të tjerë që mund të jenë përfshirë. Në njoftim nuk jepen hollësi për operatorin ekonomik apo detyrat konkrete që administratori dyshohet se nuk do të kryente në këmbim të parave. /skyweb.al
