Kryeministrja italiane Giorgia Meloni ka kërkuar pranë Zyrës së Bashkimit Evropian për Pronësinë Intelektuale (EUIPO) regjistrimin e zërit të saj si markë tregtare, në një përpjekje për të parandaluar përdorimin e paautorizuar të zërit të saj, veçanërisht përmes inteligjencës artificiale.
Aplikimi, i konfirmuar nga zyra e kryeministres, përfshin një regjistrim audio prej vetëm katër sekondash, në të cilin Meloni shqipton dy herë në italisht frazën “Unë jam Giorgia”.
Shprehja “Io sono Giorgia” është prej vitesh e lidhur ngushtë me figurën publike të kryeministres italiane. Ajo u bë edhe titulli i autobiografisë së Melonit, botuar në vitin 2021.
Kërkesa për regjistrimin e zërit vjen pas disa rasteve të manipulimit të imazhit të Melonit në internet, përfshirë krijimin dhe shpërndarjen e materialeve pornografike të falsifikuara.
Meloni i ka dënuar publikisht këto materiale, duke i cilësuar si pjesë të përhapjes së dezinformimit dhe ka bërë thirrje që përdoruesit të verifikojnë përmbajtjen përpara se ta shpërndajnë.
Në vitin 2024, kryeministrja italiane ndërmori gjithashtu një proces gjyqësor në Itali ndaj një personi të akuzuar për krijimin dhe publikimin e imazheve pornografike të manipuluara me fytyrën e saj.
Çështja vijon të jetë në gjykatë, ndërsa përpjekja për të regjistruar zërin si markë tregtare shënon një tjetër hap nga Meloni për të mbrojtur identitetin e saj publik nga përdorimet e paautorizuara në epokën e inteligjencës artificiale.
