Presidenti Bajram Begaj vizitoi sot Dibrën, ku u takua me kryetarin e Bashkisë, Rahim Spahiu, dhe mori pjesë në përmbylljen e edicionit të 32-të të festivalit “Oda Dibrane”.
Në takimin me Spahiun, kreu i shtetit diskutoi për projektet dhe sfidat e zhvillimit lokal, promovimin e trashëgimisë dhe potencialet turistike të zonës.
Gjatë fjalës në festival, Begaj e cilësoi “Odën Dibrane” si simbol të bashkimit të shqiptarëve dhe veprimtari që kontribuon në ruajtjen e identitetit kombëtar.
“Dy qytete, dy shtete, një Dibër. Një kulturë që nuk e ndajnë dot kufijtë”, u shpreh Presidenti.
Ai theksoi se festivali bashkon shqiptarët nga Shqipëria, Kosova, Maqedonia e Veriut, Mali i Zi, Lugina e Preshevës, komunitetet arbëreshe dhe Diaspora.
Duke u ndalur te roli i odës në traditën shqiptare, Begaj e përshkroi atë si hapësirën ku përcillen mençuria popullore, këngët, zakonet, besa dhe mikpritja. Në këtë kuptim, ai e quajti “Odën Dibrane” një “odë të madhe shqiptare”.
Presidenti kërkoi që trashëgimia kulturore të mbahet gjallë përmes pjesëmarrjes dhe përcjelljes së saj te brezat e rinj.
“Trashëgimia kulturore nuk është vetëm kujtim i së shkuarës dhe folklori nuk mund të jetë një muze që hapet disa herë në vit, vetëm për festa”, deklaroi ai.
Sipas Begajt, këngët, vallet, ritet, instrumentet dhe mjeshtëritë rrezikojnë të mbeten vetëm në arkiva nëse nuk mësohen dhe nuk praktikohen nga brezi tjetër.
Kreu i shtetit vlerësoi edhe kontributin e Diasporës, duke i cilësuar gjuhën, këngën, vallen dhe zakonet si ura që lidhin shqiptarët me vendlindjen.
Në mbyllje, ai falënderoi organizatorët, artistët, studiuesit, institucionet dhe publikun që e kanë mbështetur festivalin përgjatë 32 viteve, duke uruar që “Oda Dibrane” të vazhdojë si një vend ku dera mbetet e hapur dhe tradita bëhet pjesë e së ardhmes.
