Shpejtësia me të cilën zemra kthehet në ritmin normal pas aktivitetit fizik mund të tregojë shumë për shëndetin kardiovaskular dhe gjendjen e përgjithshme të organizmit.
Sipas specialistëve, rikuperimi i rrahjeve të zemrës (HRR) matet duke krahasuar pulsin menjëherë pas ushtrimeve me atë pas një minute pushimi. Një rënie prej të paktën 18 rrahjesh në minutë konsiderohet tregues i mirë, ndërsa një rënie më e vogël se 12 rrahje mund të sinjalizojë probleme të mundshme shëndetësore.
Studimet kanë treguar se rikuperimi i ngadaltë i pulsit lidhet me rrezik më të lartë të vdekshmërisë dhe mund të jetë një shenjë paralajmëruese për probleme kardiovaskulare.
Ky proces ndikohet edhe nga sistemi nervor autonom, i cili rregullon përshpejtimin dhe ngadalësimin e rrahjeve të zemrës. Përmirësimi i formës fizike përmes ecjes së shpejtë, çiklizmit, notit apo vrapimit mund të ndihmojë në përmirësimin e rikuperimit.
Ekspertët këshillojnë që personat që shqetësohen për ritmin e zemrës të konsultohen me mjekun. Testi nuk zëvendëson vlerësimin mjekësor dhe duhet treguar kujdes në rast të dhimbjes së gjoksit, marramendjes apo vështirësive të pazakonta në frymëmarrje. /skyweb.al
