Shqipëria ka përqindjen më të lartë në Ballkanin Perëndimor dhe në Evropë për numrin e të diplomuarve në Teknologji Informacioni dhe Komunikimi (TIK), në raport me totalin e të gjithë të diplomuarve. Sipas një raporti të Këshillit të Bashkëpunimit Rajonal (RCC), të rinjtë që diplomohen në këtë fushë përbëjnë 8% të të gjithë diplomantëve në vend.
Megjithatë, kjo nuk përkthehet në prani të fortë të specialistëve në tregun vendas. Vetëm 1% e fuqisë punëtore në Shqipëri përbëhet nga profesionistë të TIK-ut, ndjeshëm më pak se mesatarja 3% në vendet e tjera të Ballkanit Perëndimor. Shumë prej të rinjve zgjedhin të punojnë për tregun evropian, ku pagat janë dukshëm më të larta se ato që ofrohen nga bizneset shqiptare.
Raporti thekson se Shqipëria ka përmirësuar ndjeshëm aftësitë digjitale krahasuar me vitet e mëparshme, por ende mbetet prapa mesatares së rajonit dhe Bashkimit Evropian.
Nga ana tjetër, vendi ynë renditet i pari në Ballkan dhe ndër më të lartët në Evropë për mbulimin e popullsisë me internet, si dhe për numrin e përdoruesve të shërbimeve publike online.
Sa i përket bizneseve, përdorimi i rrjeteve sociale për promovim është më i lartë se në BE. Por vetëm 27% e ndërmarrjeve të vogla dhe të mesme në Shqipëri kanë një nivel bazë të intensitetit digjital, shumë më pak se mesatarja rajonale prej 43% dhe ajo e BE-së prej 58%.
Qeveria shqiptare ka shpallur zhvillimin e aftësive digjitale si një nga prioritetet kryesore dhe ka hartuar strategji për këtë qëllim. Janë ngritur qendra teknologjie dhe inovacioni si TUMO Tirana, ndërsa po zbatohen programe si Digital Valley Albania (DiVA) dhe Digital Jobs Albania, të cilat synojnë rritjen e aftësive dhe punësimin në sektorin digjital.
