Kur një linjë ajrore shpall një porosi të re për Airbus, pasagjerët shpesh pyesin se sa shpejt do të fluturojë avioni i ri.
Realiteti është se nga momenti i porosisë deri te dorëzimi, procesi zakonisht zgjat dy deri në tre vjet, e shpesh edhe më gjatë.
Çdo fazë e prodhimit, nga dizajni dhe sigurimi i pjesëve, tek montimi dhe instalimi i kabinës, zhvillohet në mënyrë të koordinuar në uzinat globale të Airbus.
Por pasi montimi përfundon, dorëzimi ndodh relativisht shpejt: vetëm katër deri në pesë ditë, duke përfshirë inspektimet, fluturimet testuese dhe ceremoninë e zyrtarizimit të avionit tek klienti.
Megjithatë, vonesat janë të zakonshme. Problemet e zinxhirit të furnizimit shpesh shtyjnë afatet me gjashtë muaj deri në një vit.
Kështu, një avion i porositur në vitin 2025 mund të mos transportojë pasagjerë deri në vitin 2028.
Arsyet kryesore të vonesave
- Mungesa e motorëve: Shumë avionë të përfunduar kanë mbetur në pistë duke pritur furnizime.
- Kabina të personalizuara: Sa më shumë që linjat ajrore kërkojnë konfigurime të veçanta, aq më i gjatë bëhet procesi i dorëzimit.
- Sistemi i montimit “lean”: Efikas për prodhim në kohë, por i brishtë ndaj krizave, pasi Airbus mban inventar të kufizuar krahasuar me Boeing.
Çfarë do të thotë kjo për linjat ajrore
Për kompanitë ajrore, mesazhi është i qartë: porositë e reja kërkojnë durim, planifikim të kujdesshëm dhe shpesh alternativa rezervë përmes leasing-ut. Në një treg ku kërkesa për avionë të rinj është e lartë dhe zinxhirët e furnizimit të tensionuar, çdo avion i ri përfaqëson jo vetëm investim financiar, por edhe një provë të menaxhimit strategjik të flotës. /skyweb.al
