Nga viti i ardhshëm, prindërit që kanë fëmijë nën 18 vjeç do të përfitojnë automatikisht një zbritje prej 48 mijë lekësh nga baza e tatueshme në Deklaratën e të Ardhurave Personale. Vendimi, tashmë i publikuar nga Drejtoria e Përgjithshme e Tatimeve, synon të mbështesë financiarisht familjet shqiptare.
Drejtori i Përgjithshëm i Tatimeve, Ilir Binaj, bëri të ditur se kjo skemë do të mbulojë rreth 500 mijë fëmijë, sipas Censit të fundit. “Nëse përfitojnë të gjithë, kostoja mund të arrijë deri në 20 milionë euro. Ky është një model që përdoret në shumë vende, përfshirë edhe SHBA-në, për të ndihmuar familjet me fëmijë,” tha Binaj.
Sipas llogaritjeve, një individ me pagë bruto 150 mijë lekë në muaj (1.8 milionë lekë në vit), aktualisht paguan 187,200 lekë tatim vjetor. Me përfitimin e zbritjes prej 48 mijë lekësh, detyrimi i tij do të ulet në 180,960 lekë, duke kursyer 6,240 lekë në vit. Për familjet me dy fëmijë nën 18 vjeç, përfitimi dyfishohet, duke sjellë një ulje prej 12,480 lekësh në vit.
Ndërkohë, nga viti i ardhshëm parashikohet edhe një lehtësi shtesë për prindërit me të ardhura vjetore deri në 1.2 milionë lekë. Ata do të kenë të drejtë të zbresin deri në 100 mijë lekë shpenzime për arsimimin e fëmijëve. Kjo do të thotë se tatimi vjetor për këtë kategori prindërish do të bjerë nga 109,200 lekë në 89,960 lekë, duke kursyer rreth 19,240 lekë çdo vit. /Skyweb.al
