Një verë e pazakontë ishteb kjo e këtij viti në Evropë, me temperature të larta, thatësira e nga ana tjetër përmbytje që shkaktuan dëme të mëdha ekonomike.
Sipas një studimi të fundit, këto kushte ekstreme kanë rezultuar në humbje afatshkurtra që arrijnë deri në 43 miliardë euro vetëm në Bashkimin Europian.
Eksperti i Universitetit të Mannheim-it, Sehrish Usman, që ka kontribuar në studim, paralajmëron se këto humbje do të rriten ndjeshëm në vitet në vijim, duke arritur deri në 126 miliardë euro deri në vitin 2029.
Vendet që kanë pësuar dëmet më të mëdha ekonomike janë Qipro, Greqia, Malta dhe Bullgaria, ku dëmet shkojnë mbi 1% të vlerës së tyre bruto vjetore për vitin 2024. Pas tyre renditen vendet e tjera mesdhetare si Spanja, Italia dhe Portugalia.
Studimi përfshiu faktorë të ndryshëm si ndërprerjet në punë për shkak të vapës së lartë, dëmtimet në infrastrukturë nga përmbytjet, ndërprerjet në sistemet e transportit dhe efektet afatgjata që ndikojnë në ekonominë e vendeve.
Ekonomisti i Bankës Botërore, Stephane Hallegatte, nënvizon se ndikimet e motit ekstrem nuk janë vetëm ato që shihen menjëherë, por edhe pasojat zinxhir që prekin shëndetin, transportin, furnizimin me energji dhe ujin. /Skyweb.al
