Kontrolli i Lartë i Shtetit ka evidentuar probleme serioze në menaxhimin e investimeve nga Enti Kombëtar i Banesave gjatë viteve 2023–2025.
Sipas raportit përfundimtar të auditimit, publikuar sëfundmi, institucioni ka lidhur tri kontrata për ndërtimin e banesave, me vlerë të përgjithshme rreth 283 milionë lekë me TVSH, pa i dërguar për miratim në Këshillin Drejtues. Në total, bëhet fjalë për rreth 2.9 milionë euro.
Audituesit konstatojnë gjithashtu mospërputhje me ligjin për menaxhimin financiar dhe kontrollin, statutin e EKB-së dhe udhëzimin për programet ekonomike të shoqërive me kapital shtetëror.
Shkelja e konstatuar lidhet me anashkalimin e procedurës së miratimit dhe të mekanizmit të kontrollit nga organi drejtues i institucionit.
Por, referuar raportit të konsultuar nga skyweb.al, problemet nuk kufizohen vetëm te kontratat.
Për vitin 2024, EKB kishte planifikuar 768.9 milionë lekë për gjashtë objekte të reja, por realizimi i tyre rezultoi zero. Në të njëjtin vit nuk u realizuan as 218.9 milionë lekë investime të mbartura nga viti 2023.
Në total, programi i investimeve për vitin 2024 mbeti i parealizuar në masën 987.9 milionë lekë, ose rreth 10 milionë euro.
Realizimi i investimeve mbeti në nivele minimale edhe gjatë vitit 2025. Për këtë vit ishin planifikuar rreth 1.45 miliardë lekë investime, ndërsa deri më 30 shtator ishin realizuar vetëm 8.6 milionë lekë.
Kjo përfaqëson vetëm 0.5% të planit vjetor të investimeve. Të dhënat tregojnë se Enti Kombëtar i Banesave, institucioni përgjegjës për ndërtimin dhe financimin e banesave me kosto të ulët, ka pasur probleme të njëkohshme në miratimin, planifikimin dhe realizimin e investimeve. /skyweb.al
