Shqipëria po kthehet me shpejtësi në destinacionin më në modë të Mesdheut dhe këtë e konfirmon edhe shkrimi më i fundit i Sam Sears për faqen e njohur turistike Travel Off Path.
Sears, i cili e vizitoi Shqipërinë disa vite më parë, shkruan se atëherë vendi sapo kishte nisur të fitonte vëmendje ndërkombëtare, por tani është shndërruar në një “yll të vërtetë” në hartën turistike botërore.
Për ata që pyesin se cilat janë perlat më të bukura përgjatë bregdetit shqiptar, një nga përgjigjet më të spikatura është Himara, një vend që shumë vendas preferojnë ta mbajnë për vete.
Ky qytet i qetë bregdetar ndodhet në një pikë ideale të Rivierës Shqiptare, duke ofruar të gjitha bukuritë e zonës, por pa rrëmujën dhe turmat e mëdha që karakterizojnë destinacionet më të njohura.
Himara i pret vizitorët me ujëra kristal, gjire të përshtatshme për not, restorante me pamje nga deti dhe mundësi për ekskursione ditore në Jalë apo Gjipe, dy prej vendeve me ujërat më të pastra në bregdet.
Për ata që duan një përvojë të qetë, mjafton të qëndrojnë brenda vetë qytetit: plazhet e Potamit dhe Livadhit janë ndër më të dashurit për pushuesit, ndërsa Porto Palermo ofron një përzierje unike të historisë dhe natyrës me kështjellën e saj dhe plazhet e qeta si ai i Spillesë.
Pas një dite relaksi nën diell, nuk ka mënyrë më të mirë për ta përmbyllur ditën sesa një shëtitje nëpër rrugicat e qytetit të vjetër të Himarës, një vend që të jep ndjesinë e një udhëtimi në kohë.
“Shqipëria mund të mos jetë më sekreti më i ruajtur i Mesdheut, por Himara vazhdon të mbetet një perlë ende e pazbuluar nga shumë”, përfundon artikullin Sam Sears. /Skyweb.al
