Çmimi i kafesë në Bashkimin Europian ka shënuar një rritje të ndjeshme gjatë gushtit 2025, duke u rritur mesatarisht me 20.4% krahasuar me të njëjtën periudhë të vitit 2024, sipas të dhënave të fundit të Eurostat.
Rritjet më të ulëta janë regjistruar në Portugali (+10.6%), Maltë (+11.3%) dhe Irlandë (+12.1%). Ndërsa në krahun tjetër, vendet baltike kanë pësuar goditjet më të forta në çmimin e kafesë: Estonia ka parë një rritje marramendëse prej +40.9%, e ndjekur nga Letonia me +34.2% dhe Suedia me +29.4%.
Sipas grafikut të publikuar nga Eurostat, pothuajse të gjitha vendet e BE-së kanë regjistruar rritje dyshifrore të çmimit të kafesë, me përjashtime të pakta në Europën Jugore dhe Perëndimore.
Ekspertët vërejnë se faktorët kryesorë pas kësaj rritjeje lidhen me tregjet globale të kafesë, luhatjet e prodhimit për shkak të kushteve klimatike dhe kostot më të larta të transportit.
Raporti u publikua në kuadër të Ditës Ndërkombëtare të Kafesë, duke theksuar edhe njëherë rëndësinë e këtij produkti të konsumit të përditshëm në Europë.
Ndërkohë që vendet e BE-së kanë raportuar shtrenjtim të fortë, pyetja lind: po në Shqipëri, a do të reflektohet kjo rritje?
Sipas tregtarëve dhe importuesve, çmimi i kafesë në vend është rritur ose pritet të rritet me 10 deri në 30 lekë për filxhan gjatë muajve në vijim, si pasojë e shtrenjtimit në tregjet ndërkombëtare dhe rritjes së kostove të importit.
Aktualisht, 100 gramë kafe në dyqane shitet me 130–140 lekë, nga rreth 110 lekë që ishte vetëm pak kohë më parë.
Po ashtu, baret dhe restorantet kanë nisur të paralajmërojnë rritje të çmimeve, duke theksuar se përveç shtrenjtimit të importit, edhe cilësia e kafesë që arrin në treg shpesh ka pësuar ndryshime, pasi importuesit përpiqen të ulin kostot.
Kafeja, produkt i pandashëm i konsumit
Në Shqipëri, ku konsumi i kafesë është pjesë e përditshme e kulturës urbane, çdo ndryshim i çmimit reflektohet menjëherë në xhepin e konsumatorit.
Për momentin, rritja nuk ka qenë aq e theksuar sa në vendet e BE-së, por ekspertët paralajmërojnë se shtrenjtimi global nuk do të mund të anashkalohet gjatë…/skyweb.al
