Në zemër të Tiranës, aty ku prej dekadash qëndron Shtëpia e Fëmijës “Zyber Hallulli”, do të ngrihet një tjetër kullë shumëkatëshe.
Siç mëson Skyweb.al, Korporata e Investimeve Shqiptare ka hapur sëfundmi garën që do të përcaktojë kompaninë private që do të ndërtojë kompleksin e ri në truallin e këtij institucioni, të njohur si “streha e jetimëve”.
Sipas dokumenteve të publikuara nga vetë Korporata, projekti do të realizohet përmes modelit të “sipërmarrjes”, ku partneri privat do të ndërtojë dy godina publike, Korpusin e Inspektoriateve dhe Shtëpinë e re të Fëmijëve “Zyber Hallulli”, ndërsa në këmbim do të marrë të drejtën për të zhvilluar truallin ekzistues në Rrugën e Elbasanit.
Në këtë parcelë, me vlerë të jashtëzakonshme tregtare ku një metër katror shitet me mijëra euro, do të ngrihet një kullë me përdorim të përzier, që do të përfshijë hapësira tregtare, zyra dhe apartamente.
Sipas kushteve të garës, çdo ofertues duhet t’i japë shtetit të paktën 45 për qind të sipërfaqes së ndërtimit, ndërsa fitues do të shpallet ai që ofron më shumë metra katrorë për Korporatën.
Ndërkohë, fëmijët që aktualisht jetojnë në Shtëpinë e Fëmijës do të zhvendosen në zonën e “vilave gjermane”, pranë rrugës Gramoz Pashko, në një kompleks të ri që parashikohet të strehojë rreth 40 fëmijë.
Në dokument thuhet se “zona e re ofron një mjedis më të gjelbër dhe të qetë”, por realiteti është se jetimët po dërgohen në periferi, larg qytetit dhe kujdesit publik që historikisht ka qenë pranë tyre.
Ky është një tjetër rast ku prona publike me vlerë të jashtëzakonshme në qendër të Tiranës i kalon sektorit privat, përmes një formule që quhet “partneritet publik-privat”, por që në praktikë i jep truallin e shtetit zhvilluesve të mëdhenj. /skyweb.al
