Agjencia ndërkombëtare e vlerësimit të kredive Moody’s ka rikonfirmuar stabilitetin makroekonomik të Shqipërisë, duke vlerësuar pozitivisht aftësinë e vendit për të përballuar tre goditjet e mëdha të dekadës së fundit, tërmetin, pandeminë dhe krizën energjetike evropiane.
Moody’s thekson se ekonomia shqiptare ka treguar qëndrueshmëri dhe ritëm të shpejtë rimëkëmbjeje, ndërsa perspektiva e rritjes në periudhën afatmesme mbetet e qëndrueshme.
Agjencia parashikon që Prodhimi i Brendshëm Bruto (PBB) i Shqipërisë të rritet me 3.7% në vitin 2025 dhe 3.5% në vitin 2026, i nxitur kryesisht nga konsumi i brendshëm dhe investimet në turizëm dhe energji. Sektori i turizmit pritet të mbetet një nga motorët kryesorë të zhvillimit ekonomik, duke ndikuar në rritjen e eksporteve të shërbimeve dhe në zgjerimin e aktivitetit ndërtimor.
Në planin fiskal, Moody’s vlerëson trendin pozitiv të borxhit publik, i cili pas rritjes së ndjeshme gjatë krizave, ka nisur rënien që prej vitit 2022.
Raporti i borxhit ndaj PBB-së zbriti në 54.2% në vitin 2024, nga 74.1% që kishte arritur në vitin 2021. Parashikimet tregojnë se borxhi publik mund të ulet më tej, në 53.5% të PBB-së deri në vitin 2026, i mbështetur nga rritja e qëndrueshme ekonomike dhe ruajtja e suficitit primar fiskal.
Moody’s thekson gjithashtu se autoritetet shqiptare pritet të vijojnë zbatimin e rregullave fiskale të përcaktuara në Ligjin Organik të Buxhetit, për të ruajtur një bilanc të balancuar dhe për të ulur gradualisht raportin e borxhit të përgjithshëm të qeverisë deri në nivelin e synuar prej 45% të PBB-së.
Sipas vlerësimit, investimet e huaja direkte mbeten një faktor kyç për zbutjen e rreziqeve të bilancit të pagesave. Deficiti i llogarisë korrente, që ishte 2.4% e PBB-së në vitin 2024, pritet të mbetet rreth këtij niveli gjatë viteve 2025–2026, ndjeshëm më i ulët se mesatarja e periudhës 2017–2022.
Raporti i Moody’s vlerëson se sektori financiar shqiptar mbetet mirë i kapitalizuar dhe likuid, ndërsa rreziqet sistemike janë të kufizuara. Shqipëria pritet gjithashtu të përfitojë nga fondet e Bashkimit Europian dhe nga zbatimi i reformave të lidhura me procesin e anëtarësimit, veçanërisht në sundimin e ligjit, luftën kundër korrupsionit dhe mirëqeverisjen.
Sipas Ministrisë së Financave, ky vlerësim i Moody’s është një sinjal pozitiv për investitorët ndërkombëtarë dhe tregon përparimin e qëndrueshëm të reformave strukturore që mbështesin rritjen ekonomike dhe integrimin europian të Shqipërisë. /skyweb.al
