Me një vendim të fundit qeveria synon të forcojë masat e kontrollit për ngarkesat me produkte organike që hyjnë apo dalin nga vendi, në kuadër të rritjes së sigurisë dhe garantimit të cilësisë në treg.
Sipas vendimit të publikuar në Fletoren Zyrtare, importuesit dhe eksportuesit e produkteve organike do të jenë të detyruar të njoftojnë paraprakisht autoritetet doganore të paktën 24 orë përpara mbërritjes së ngarkesës, duke dorëzuar të gjithë dokumentacionin tregtar dhe certifikatat përkatëse organike.
Ngarkesat që konsiderohen me “rrezik të lartë” do t’i nënshtrohen kontrolleve fizike dhe marrjes së mostrave. Pas analizave, inspektorët do të vendosin nëse produktet mund të hyjnë si organike, të riklasifikohen si jo organike, apo të ndalohen plotësisht.
Gjithashtu, importuesit kanë detyrimin të mbajnë dhe administrojnë të gjithë dokumentacionin për çdo ngarkesë, përfshirë certifikatat dhe verifikimet , dhe ta ruajnë atë për inspektim nga autoritetet dhe trupat e kontrollit.
Në rastet kur gjatë kontrollit lindin dyshime mbi cilësinë apo origjinën e produkteve, autoritetet kanë të drejtë të ndalojnë përkohësisht futjen apo tregtimin e tyre deri në përfundim të analizave përkatëse.
Këto masa synojnë të mbrojnë konsumatorin dhe të garantojnë që produktet organike në tregun shqiptar të jenë të certifikuara dhe me origjinë të qartë. /Skyweb.al
