Shumica e mësuesve në Shqipëri janë të kënaqur me kushtet e tyre të punësimit, duke tejkaluar edhe mesataren e vendeve të OECD. Sipas një studimi të kryer nga Organizata për Zhvillim dhe Bashkëpunim Ekonomik (OECD), rreth 79% e mësuesve “pajtohen” ose “pajtohen fuqimisht” se janë të kënaqur me kushtet e tyre të punësimit, më e lartë se mesatarja e OECD-së prej 68%.
Për sa i përket pagës specifikisht, rreth 36% e mësuesve “pajtohen” ose “pajtohen plotësisht” se janë të kënaqur me pagat e tyre, ngjashëm me mesataren e OECD-së prej 39%.
Në Shqipëri, burimet më të zakonshme të stresit për mësuesit janë të qenit përgjegjës për arritjet e nxënësve me 49%, të qenit përgjegjës për mirëqenien sociale dhe emocionale të nxënësve me 35% dhe 33% raportojnë ruajtje të disiplinës në klasë.
Nga ana tjetër, shumë shkolla u detyruan të zhvillonin mësim online ose hibrid gjatë pandemisë COVID-19, disa shkolla i kanë ruajtur këto metoda thuhet në studim. Në Shqipëri, 10% e mësuesve punojnë në shkolla ku të paktën një mësim është dhënë si hibrid ose online në muajin e fundit. Vendet e OECD zhvillojnë më tepër mësim të kombinuar ose online.
Mësuesit në Shqipëri e përdorin inteligjencën artificiale më shumë se çdo vend tjetër i Organizatës për Zhvillim dhe Bashkëpunim Ekonomik. Kjo nuk është për t’u habitur, duke marrë parasysh faktin se qeveria ka hartuar një strategji për zbatimin e inteligjencës artificiale në një sërë sektorësh. Rreth 52% e mësuesve raportojnë se kanë përdorur inteligjencë artificiale (IA) në punën e tyre. Mësuesit kanë tendencë të përdorin IA-në për të ndihmuar nxënësit të praktikojnë aftësi të reja në skenarë të jetës reale, të gjenerojnë plane mësimore ose aktivitete, të mësojnë dhe të përmbledhin në mënyrë efikase një temë.
Përdorimi më pak i shpeshtë i inteligjencës artificiale është për të mbështetur nxënësit me nevoja të veçanta arsimore, të gjenerojnë tekst për reagimet e nxënësve ose komunikimet me prindin/kujdestarin dhe të vlerësojnë punën e nxënësve. /tvscan.al
