Çmimi Nobel për Ekonomi këtë vit iu dha tre ekonomistëve të njohur për kontributin e tyre në kuptimin e rolit të teknologjisë në nxitjen e rritjes ekonomike të qëndrueshme.
Joel Mokyr, ekonomist amerikano-izraelit, u nderua me gjysmën e çmimit për hulumtimin e tij mbi parakushtet që mundësojnë rritjen e qëndrueshme përmes përparimit teknologjik. Ndërsa Philippe Aghion nga Franca dhe Peter Howitt nga Kanadaja ndanë gjysmën tjetër, për zhvillimin e teorisë së “shkatërrimit krijues” si mekanizëm për rritjen ekonomike afatgjatë.
Sipas Akademisë Mbretërore Suedeze të Shkencave, puna e këtyre studiuesve adreson një nga pyetjet më themelore në ekonomi: Si ndikon përparimi teknologjik në mirëqenien e vazhdueshme ekonomike?.
John Hassler, kryetar i Komitetit të Çmimit, tha se për një pjesë të madhe të historisë njerëzore, standardet e jetesës ishin të pandryshueshme nga brezi në brez, ndërsa rritja ekonomike ishte pothuajse e papërfillshme. Megjithatë, gjatë 200 viteve të fundit, bota ka përjetuar një rritje të jashtëzakonshme ekonomike – një fenomen që këta laureatë e ndihmojnë të kuptohet më mirë.
Kerstin Enflo, anëtare e Komitetit për Çmimin Nobel, theksoi se periudha e zhvillimit të shpejtë ekonomik është relativisht e shkurtër në raport me historinë e gjatë të stagnimit. Ajo paralajmëroi se përparimi nuk duhet marrë si i mirëqenë dhe nënvizoi rëndësinë e faktorit njerëzor dhe politikave që nxisin vazhdimësinë e tij.
Profesor në Universitetin Northwestern në SHBA, Joel Mokyr është veçuar për mënyrën se si ai ka përdorur burime historike për të kuptuar transformimin e inovacionit në një proces të vetë-qëndrueshëm. Ai ka treguar se nuk mjafton vetëm të dihet se një shpikje funksionon, por duhet të kuptohet shkencërisht edhe pse funksionon, në mënyrë që inovacionet të mund të ndërtohen mbi njëra-tjetrën në mënyrë të vazhdueshme. /Skyweb.al
