Një avion i kompanisë “United Airlines”, tip Boeing 737-8 MAX me regjistrim N17327, që kryente fluturimin UA1093 nga Denver drejt Los Angeles, u detyrua të devijojë rrugën dhe të ulej urgjentisht në Salt Lake City pas një incidenti të pazakontë në fluturim, që dyshohet të jetë shkaktuar nga përplasja me një mbetje hapësinore.
Sipas portalit të specializuar NSH Aviation, avioni ndodhej në lartësinë FL360 (rreth 11 mijë metra), rreth 180 milje detare në juglindje të Salt Lake City, kur ekuipazhi konstatoi plasaritjen e një shtrese të xhamit të kabinës së pilotëve. Pas zbritjes në FL260, u vendos devijimi drejt Salt Lake City, ku avioni u ul në mënyrë të sigurt në pistën 16L, rreth 50 minuta pas nisjes së zbritjes.
Në bord ndodheshin 140 pasagjerë, të cilët nuk pësuan asnjë lëndim. Një nga pilotët është lënduar lehtë në krah, si pasojë e copëzave të xhamit që janë përhapur në kabinë.
Kompania ka raportuar se avioni u ndal për inspektim teknik, ndërsa një Boeing 737-9 MAX zëvendësues vijoi fluturimin drejt Los Angeles, duke mbërritur me një vonesë prej rreth gjashtë orësh.
Ekspertët po hetojnë nëse çarja e xhamit mund të jetë shkaktuar nga goditja me një fragment hapësinor, një dukuri gjithnjë e më shqetësuese për aviacionin civil, për shkak të rritjes së mbetjeve orbitale që herë pas here hyjnë në atmosferë.
Megjithatë, ekuipazhi i “United Airlines” ka vepruar me profesionalizëm, duke garantuar një ulje të sigurt dhe pa pasoja për pasagjerët.
Çfarë janë mbetjet hapësinore?
Mbetjet hapësinore janë objekte të krijuara nga njeriu që ndodhen në orbitë rreth Tokës, por që nuk kanë më asnjë funksion. Ato përfshijnë satelitë të vjetër jashtë përdorimit, pjesë raketash të lëna pas lançimeve, copëza metalike nga përplasjet apo shpërthimet në hapësirë, dhe mbetje të tjera të vogla.
Këto objekte lëvizin me shpejtësi shumë të madhe dhe përbëjnë një rrezik serioz për satelitët aktivë, për misionet hapësinore dhe për astronautët.
Me kalimin e viteve, sasia e mbetjeve është rritur ndjeshëm, duke e kthyer orbitën e Tokës në një zonë gjithnjë e më të mbingarkuar dhe të rrezikshme për aktivitetet hapësinore. /skyweb.al
