ensionistët do të marrin një bonus më të lartë këtë fundvit. Qeveria ka miratuar një akt normativ që ndryshon buxhetin e shtetit për vitin 2025, duke shtuar fondin e dedikuar për shpërblimin e fundvitit në 5.9 miliardë lekë, ose rreth 59 milionë euro.
Sipas relacionit shpjegues, rritja e fondit vjen si rezultat i tejkalimit të të ardhurave nga kontributet shoqërore, si dhe për të përmirësuar nivelin e mbështetjes ekonomike për pensionistët, një kategori që përballet me vështirësi të ndjeshme financiare.
Bonusi do t’u shpërndahet rreth 756 mijë pensionistëve, ndërsa përfitimi i tij është rritur vit pas viti si në frekuencë ashtu edhe në masë, me qëllim mbulimin sa më të plotë të nevojave bazë të kësaj shtrese të popullsisë.
Ndërkohë, akti normativ parashikon edhe shtesa në shpenzimet kapitale me financim të brendshëm, në vlerën e 7.97 miliardë lekëve. Pjesa më e madhe e tyre, afro 6 miliardë lekë, do të përdoren për avancimin e projekteve të Ministrisë së Infrastrukturës dhe Energjisë.
Në fushën e transportit rrugor, financimi do të përshpejtojë projekte me performancë të mirë si:
ndërtimi i rrugës lidhëse Tiranë–Elbasan me Korridorin VIII,
rikualifikimi urban i Superstradës Tiranë–Durrës (Faza I–III),
ndërtimi i rrugës Kashar–Nyja Vaqarr (Faza III),
dhe spostimi i linjave të tensionit të lartë përgjatë Korridorit VIII.
Në transportin ajror, rreth 3 miliardë lekë do t’i kalojnë Albcontrol-it në formë transferte kapitale, për të mbështetur funksionimin e tij pas problemeve të krijuara nga bllokimi i llogarive.
Gjithashtu, 203 milionë lekë do të përdoren për mbylljen e detyrimeve të institucioneve nën varësinë e Ministrisë së Energjisë (AIE, AKBN, etj.), ndërsa 364 milionë lekë janë planifikuar për vijimin e projektit hekurudhor “Terminali i transportit publik–stacioni i trenit Tiranë”, si zgjatim i linjës Durrës–Tiranë.
Në programe të tjera, rreth 50 milionë lekë do të shkojnë për mbështetjen e industrisë dhe burimeve natyrore.
Qeveria argumenton se ndryshimet në buxhet pasqyrojnë performancën pozitive të të ardhurave në nëntëmujorin e parë dhe rishpërndarjen e fondeve për institucionet që kishin mbetur pa mbulim buxhetor pas ndryshimeve të fundit në kabinetin qeveritar. /skyweb.al
