Komisioni Europian ka deklaruar se Meta dhe TikTok kanë shkelur detyrimet e transparencës sipas Aktit të Shërbimeve Dixhitale (DSA). Sipas gjetjeve të Komisionit, platformat nuk i kanë ofruar studiuesve aksesin e duhur në të dhënat publike që gjenerohen në rrjetet e tyre, duke penguar kërkimet që lidhen me dezinformimin, sigurinë online dhe përhapjen e përmbajtjeve të dëmshme.
Meta, që zotëron Facebook dhe Instagram, akuzohet gjithashtu se nuk ka krijuar një sistem të qartë dhe të lehtë për përdoruesit që duan të raportojnë përmbajtje të paligjshme. Komisioni pretendon se Meta ka përdorur ndërfaqe me hapa të panevojshëm dhe dizajne që mund të jenë mashtruese, duke e bërë të vështirë për qytetarët të kuptojnë ose të përfundojnë procesin e raportimit.
Në rastin e TikTok, autoritetet europiane vlerësojnë se kompania nuk ka përmbushur standardet e kërkuara për transparencën e të dhënave dhe për qasjen e studiuesve, gjë që e vendos atë në shkelje të dispozitave të DSA-së.
Komisioni thekson se këto janë vetëm gjetje paraprake dhe se procesi ende nuk ka përfunduar. Meta dhe TikTok tani kanë mundësinë të japin përgjigjet e tyre, të justifikojnë praktikat që përdorin dhe të bëjnë ndryshime për të përmirësuar pajtueshmërinë me ligjin.
Nëse në fund do të vërtetohet se platformat kanë shkelur rregullat, ato rrezikojnë gjoba shumë të larta, deri në gjashtë për qind të të ardhurave të tyre globale vjetore. Kjo lëvizje e re e Bashkimit Evropian shihet si pjesë e përpjekjeve të tij për të forcuar zbatimin e rregullave. /Skyweb.al
