Një merimangë e rrezikuar në mënyrë kritike, që nuk ishte parë në Mbretërinë e Bashkuar për gati katër dekada, është zbuluar sërish në një rezervat natyror të largët, të arritshëm vetëm me varkë.
Bëhet fjalë për Aulonia albimana, e cila ishte regjistruar për herë të fundit në vitin 1985. Këtë herë, ajo u gjet në rezervatin natyror të “National Trust” në Newtown, në Ishullin e Wight, rreth dy kilometra larg nga kolonia e saj e dikurshme.
Kjo merimangë e vogël, me këmbë ngjyrë portokalli, është pagëzuar me emrin jozyrtar “merimanga ujku me nyje të bardha” nga studiuesit që e zbuluan.
Mark Telfer, njëri prej entomologëve që mori pjesë në kërkimet së bashku me kolegun e tij Graeme Lyons, e përshkroi zbulimin si “një nga ato momente të paharrueshme”. Ai shtoi se “gjetja e një specieje që mendohej e humbur për 40 vjet është një ndjesi emocionuese dhe dëshmi se menaxhimi i duhur i habitateve, i kombinuar me kureshtje dhe bashkëpunim, mund të sjellë rezultate të jashtëzakonshme”.
Merimangat e grupit të “ujkut” – të cilave u përkasin rreth 38 lloje që jetojnë në Mbretërinë e Bashkuar – njihen për aftësitë e tyre të jashtëzakonshme në gjueti, duke ndjekur prenë në tokë dhe duke u hedhur mbi të, ngjashëm me mënyrën si vepron një ujk, shkruan BBC.
Megjithatë, “National Trust” njoftoi se teknikat e gjuetisë së Aulonia albimana mbeten ende një mister, pasi kjo specie njihet edhe për faktin se krijon rrjeta të holla, ndryshe nga merimangat e tjera ujk që zakonisht nuk përdorin rrjeta për të kapur prenë.
Ky zbulim jep shpresë për mbrojtjen e biodiversitetit në zonat natyrore të Mbretërisë së Bashkuar dhe nënvizon rëndësinë e kujdesit ndaj habitateve të izoluara ku specie të rralla mund të mbijetojnë në fshehtësi për dekada. /Skyweb.al
