Mallrat e akcizës kanë shënuar rritje të fortë gjatë muajit tetor, duke ndikuar drejtpërdrejt në rritjen e të ardhurave të Administratës Doganore. Vetëm në këtë muaj, volumi i karburanteve të importuara u rrit me rreth 12 mijë tonkrahasuar me tetorin e vitit të kaluar, duke tejkaluar edhe nivelin e shtatorit 2025. Po ashtu, importi i cigareve u shtua me rreth 30 ton, duke reflektuar një zgjerim të konsumit.
Si rezultat, Administrata Doganore ka mbyllur tetorin 2025 me 21 miliardë lekë të ardhura, që përkojnë me rreth 210 milionë euro. Kjo përbën një rritje prej 9.3% krahasuar me të njëjtën periudhë të vitit 2024, ose afro 18 milionë euro më shumë, duke e vendosur institucionin në linjë me objektivat vjetore.
Në totalin e periudhës janar–tetor 2025, të ardhurat doganore arritën në 199.7 miliardë lekë, që janë 9.2 miliardë lekë më shumë se një vit më parë, me një ritëm rritjeje prej 5%. Rezultatet janë në përputhje të plotë me planin mujor të vendosur.
Edhe gjatë 10-mujorit, mallrat e akcizës kanë mbajtur trend pozitiv në të gjitha kategoritë kryesore. Importi i karburanteve u rrit me 71.200 ton, i cigareve me 235 ton, i kafesë me 203 ton dhe i birrës me 1.600 ton krahasuar me vitin e kaluar.
Sipas të dhënave të Administratës Doganore, këta tregues pasqyrojnë rritje të aktivitetit ekonomik dhe konsumit, të ndikuar nga sezoni i fortë turistik, i cili ka mbështetur trendin e rritjes së të ardhurave dhe pritet të vazhdojë me ritme pozitive edhe në muajt e ardhshëm. /skyweb.al
