Tregu i automjeteve në vend po kalon një periudhë rritjeje të fortë, duke reflektuar investimet në infrastrukturë dhe orientimin e qytetarëve drejt makinave më të sigurta dhe më të pastra.
Të dhënat e nxjerra nga Drejtoria e Përgjithshme e Shërbimeve të Transportit Rrugor tregojnë se nga janari deri në tetor 2025 janë regjistruar 82.814 mjete.
Ky volum është pothuajse i dyfishtë krahasuar me të njëjtën periudhë të vitit 2019, duke dëshmuar ndryshimin e dukshëm që ka pësuar tregu automotiv shqiptar.
Pjesën më të madhe të regjistrimeve e zënë autoveturat, me 67.603 njësi, që përbëjnë 81.6 për qind të totalit. Rritja e tyre lidhet me kërkesën në rritje për mjete personale më efikase, më të sigurta dhe me ndikim të ulët mjedisor.
Ky zhvillim tregon se flota rrugore po rinovohet me një ritëm të pandalshëm, duke e afruar vendin me standardet moderne evropiane. Ndërkohë, një element tjetër pozitiv vjen edhe nga heqja nga qarkullimi e 7.071 mjeteve gjatë të njëjtës periudhë, çka pritet të ndikojë drejtpërdrejt në rritjen e sigurisë rrugore.
Pavarësisht rritjes së numrit të automjeteve, infrastruktura brenda qyteteve ka mbetur thuajse e pandryshuar. Kjo mospërputhje e bën trafikun një realitet të përditshëm në çdo orë, sidomos në zonat urbane ku rrugët nuk e përballojnë dot fluksin e ri të mjeteve./skyweb.al
