Qeveria ka miratuar këtë të mërkurë një vendim që ndryshon mënyrën e raportimit të rasteve të dyshuara për pastrim parash, duke i dhënë Njësisë së Inteligjencës Financiare kompetenca më të gjera dhe një linjë të detyrueshme raportimi nga institucionet mbikëqyrëse.
Sipas vendimit, të gjitha autoritetet licencuese dhe mbikëqyrëse duhet të njoftojnë Njësinë e Inteligjencës Financiare menjëherë dhe jo më vonë se 72 orë nga momenti kur konstatojnë çdo dyshim, informacion apo të dhënë që lidhet me pastrimin e parave, financimin e terrorizmit apo financimin e armëve të shkatërrimit në masë.
Detyrimi përfshin të gjithë subjektet që operojnë nën juridiksionin e tyre.
Krahas këtij ndryshimi, qeveria thekson se Njësia e Inteligjencës Financiare është riorganizuar kohët e fundit, duke forcuar strukturën, burimet njerëzore dhe kapacitetet teknike.
Ky riorganizim ka dhënë rezultate shumë të mira deri tani në parandalimin e skemave të pastrimit të parave dhe në identifikimin e transaksioneve të dyshimta.
Me propozimin e Ministrit të Financave, Këshilli i Ministrave përcakton institucionet mbikëqyrëse që kanë detyrimin e raportimit:
1. Banka e Shqipërisë
2. Autoriteti i Mbikëqyrjes Financiare
3. Organet e qeverisjes qendrore
4. Agjencia e Mbikëqyrjes së Lojërave të Fatit dhe çdo autoritet tjetër përgjegjës për lojërat e fatit, kazinotë dhe hipodromet
5. Ministria e Drejtësisë
6. Dhoma Kombëtare e Avokatisë për avokatët
7. Ministria përgjegjëse për infrastrukturën për personat fizikë dhe juridikë që merren me:
– tregtimin e mjeteve motorike tokësore, lundruese apo ajrore
– aktivitetet e transportit dhe/ose të spedicionit
8. Agjencia e Inteligjencës Financiare për:
a) agjencitë e udhëtimit
b) shoqëritë e ndërtimit
c) bizneset e metaleve dhe gurëve të çmuar
ç) çdo person fizik ose juridik që ofron shërbime të caktuara për klientët
9. Bordi i Mbikëqyrjes Publike për:
a) audituesit ligjorë
b) kontabilistët e miratuar
Vendimi synon të krijojë një mekanizëm më të shpejtë dhe më të unifikuar raportimi, duke forcuar luftën kundër pastrimit të parave dhe duke rritur përgjegjësinë e të gjitha institucioneve mbikëqyrëse. /skyweb.al
