Banka e Shqipërisë ka ngritur alarmin për rritjen e mëtejshme të çmimeve, si pasojë e mungesës së fuqisë punëtore dhe shtrëngimit të tregut të punës. Në raportin e saj për Politikën Monetare gjatë tremujorit të tretë, institucioni thekson se, megjithëse punësimi në sektorin privat jobujqësor është rritur me 3.4% dhe papunësia ka rënë në 8.5%, ky zhvillim po shoqërohet me pasoja në rritjen e kostove të prodhimit.
Sipas Bankës, paga mesatare në sektorin privat është rritur me 9.5%, duke ndikuar në fuqinë blerëse të familjeve, por njëkohësisht edhe në përshkallëzimin e presioneve inflacioniste. “Mungesa e krahut të punës mbetet një sfidë për zgjerimin e aktivitetit ekonomik në të ardhmen dhe një faktor që mund të ushqejë inflacionin në periudhën afatmesme”, thuhet në dokument.
Në raport theksohet se inflacioni mesatar tremujor ka arritur në 2.4%, nga 2.3% dhe 2.0% në dy tremujorët e mëparshëm. Kjo rritje është ndikuar kryesisht nga çmimet e qirave dhe rritja e kostove të shërbimeve, ndërsa çmimet e ushqimeve kanë shënuar rënie të lehtë.
Banka e Shqipërisë vëren se inflacioni bazë – që përjashton mallrat me çmime të paqëndrueshme si energjia dhe ushqimet – ka shënuar rritje në 2.9%, për shkak të kushteve të ngushta në tregun e punës dhe kërkesës së lartë për banesa. Nga ana tjetër, presionet inflacioniste të importuara mbeten të dobëta, të ndikuara nga çmimet më të ulëta të lëndëve të para në tregjet ndërkombëtare dhe nga forcimi i lekut në kursin e këmbimit.
Sipas vlerësimit të Bankës, sfida kryesore për ekonominë shqiptare në muajt në vijim do të jetë ruajtja e ekuilibrit midis rritjes së pagave, kontrollit të inflacionit dhe garantimit të qëndrueshmërisë së çmimeve, në një treg pune që po tkurret me shpejtësi. /skyweb.al
