Ligji për fiskalizimin pritet të ndryshohet, me synimin për të forcuar kontrollin dhe gjurmueshmërinë e transaksioneve financiare.
Projektligji për “Faturën dhe Sistemin e Monitorimit të Qarkullimit”, i depozituar për diskutim në komisionet parlamentare, parashikon saktësime të reja për identifikimin e blerësve në rastet e eksportit të mallrave. Kur blerësi është individ, përveç emrit, mbiemrit dhe adresës, faturat do të duhet të përmbajnë edhe numrin personal të identifikimit (ID). Ky ndryshim synon të eliminojë paqartësitë në raportim dhe të sigurojë identifikim të saktë të blerësve të huaj, duke lehtësuar verifikimin nga autoritetet tatimore dhe doganore.
Një tjetër risi është shtyrja e afatit për shqyrtimin dhe plotësimin e librave të shitjes e blerjes: nga data 10, afati do të kalojë në datën 11 të muajit pasardhës. Sipas relacionit shpjegues, ky shtesë prej 24 orësh është e nevojshme për t’i dhënë sistemit kohën e duhur për përpunimin e faturave, sidomos në rastet kur faturat lejohen të lëshohen deri në datën 10 të muajit vijues.
Përvoja e zbatimit të fiskalizimit ka treguar se afati aktual prej tre ditësh për fiskalizimin e faturave të importit është shpesh i pamjaftueshëm. Pas vendosjes së mallrave në regjimin e qarkullimit të lirë, sistemi elektronik ka nevojë për kohë që të përpunojë dhe shfaqë deklaratën përkatëse, duke e bërë të vështirë për tatimpaguesit të përmbushin afatin ekzistues.
Për këtë arsye, projektligji propozon zgjatjen e afatit të fiskalizimit të faturave të importit nga 3 ditë në 7 ditë pas vendosjes së mallrave nën regjimin e qarkullimit të lirë. Ky ndryshim synon të harmonizojë kërkesat ligjore me funksionimin praktik të sistemeve elektronike dhe të lehtësojë detyrimet tatimore për bizneset.
Në tërësi, ndryshimet synojnë të rrisin transparencën fiskale, të unifikojnë terminologjinë ligjore në fushën tatimore dhe të lehtësojnë përmbushjen e detyrimeve nga tatimpaguesit, duke kontribuar në një administrim më të qëndrueshëm të të ardhurave. /Skyweb.al
