Studiuesit kanë rindërtuar origjinën evolucionare të puthjes dhe kanë zbuluar se është shumë më e vjetër sesa mendohej, shkruan BBC.
Sipas një studimi të publikuar në Evolution and Human Behaviour, puthja “gojë-më-gojë” ka evoluar rreth 21.5 milionë vjet më parë, tek paraardhësi i përbashkët i njeriut dhe majmunëve.
Shkencëtarët, të udhëhequr nga Dr. Matilda Brindle nga Universiteti i Oksfordit, përcaktuan puthjen si kontakt jo-agresiv oral-oral, me lëvizje të buzëve apo pjesëve të gojës dhe pa shkëmbim ushqimi. Ata gjetën sjellje të ngjashme me puthjen jo vetëm te njerëzit, shimpanzetë, por edhe te ujqit, qentë e prerieve, arinjtë polarë dhe madje te albatrosët.
Studimi sugjeron se edhe Neandertalët puthnin dhe madje mund të kenë shkëmbyer puthje me njerëzit modernë, gjë që mbështetet edhe nga prova të mëparshme të ADN-së që tregojnë se të dy llojet ndanin të njëjtën bakterie orale, diçka që nënkupton shkëmbim të pështymës për qindra mijëra vjet.
Megjithëse hulumtimi përcakton “kur” ka evoluar puthja, ende nuk jep një përgjigje të saktë për “pse”. Teoritë kryesore sugjerojnë se ajo mund të ketë lindur nga sjelljet e pastrimit tek paraardhësit tanë primatë, ose si një mënyrë për të vlerësuar shëndetin dhe kompatibilitetin e partnerit.
Dr. Brindle thekson se puthja është një sjellje që ndajmë me shumë kafshë dhe nuk duhet parë vetëm si diçka romantike njerëzore, por si një fenomen biologjik me rrënjë të thella evolucionare. /Skyweb.al
