Ndërkohë që protestat vijojnë, Operatori i Blerjeve të Përqendruara ka shpallur një tender për mirëmbajtjen e sistemeve të sigurisë fizike në godinën e Kryeministrisë. Procedura është klasifikuar në nivelin “Konfidencial” dhe do të zhvillohet sipas rregullave për prokurimet në fushën e mbrojtjes dhe sigurisë.
Fondi limit është 74.64 milionë lekë me TVSH. Kontrata do të financohet nga buxheti i shtetit dhe do të zgjasë për 24 muaj.
Tenderi përfshin mirëmbajtjen e kamerave të vëzhgimit, sistemeve të alarmit dhe kontrollit elektronik të hyrje-daljeve. Pjesë e tij janë edhe mbrojtja nga zjarri, audio-evakuimi, rrjeti Wi-Fi dhe sistemet telefonike VoIP.
Operatori fitues do të kujdeset gjithashtu për skanerët X-Ray, urat Metal Detector dhe platformën që integron sistemet e sigurisë.
Procedura nuk është ndarë në lote, pasi autoriteti argumenton se infrastruktura funksionon si një sistem i vetëm dhe i ndërvarur.
Kompanitë duhet të kenë certifikatë sigurie industriale të nivelit “Konfidencial” dhe personel të autorizuar për informacion të klasifikuar. /skyweb.al
