Partia Demokratike ka reaguar pas publikimeve në media lidhur me një kontratë lobimi prej 6 milionë dollarësh në Shtetet e Bashkuara të Amerikës, duke sqaruar se nuk ka asnjë detyrim financiar nga kjo marrëveshje.
Në një deklaratë për mediat, PD sqaroi se komuniteti shqiptaro-amerikan, përmes fondacionit “Make Albania Great Again”, ka kontraktuar kompaninë “Continental” për të ndihmuar në forcimin e marrëdhënieve miqësore mes Partisë Demokratike dhe institucioneve amerikane. Sipas PD-së, qëllimi i këtij bashkëpunimi është mbështetja për rikthimin e demokracisë funksionale dhe shtetit të së drejtës në Shqipëri.
Kompania “Continental” drejtohet nga Ambasadori Carlos Trujillo, një figurë e njohur për mbështetjen ndaj Presidentit Trump dhe qëndrimet e tij të forta antikomuniste.
PD theksoi se të gjitha shpenzimet janë marrë përsipër 100% nga patriotë shqiptarë që jetojnë prej dekadash në SHBA dhe nga demokratë të larguar nga Shqipëria në vitet e fundit, si pasojë e, sipas saj, “regjimit të Edi Ramës”.
“Partia Demokratike, duke falënderuar demokratët antikomunistë të komunitetit shqiptaro-amerikan për bujarinë dhe patriotizmin e tyre, sqaron se, ndonëse ka dhënë dakordësinë për marrjen e këtij shërbimi në përputhje me ligjet e të dy vendeve, nuk ka asnjë barrë financiare apo detyrim kontraktual që lind nga kjo marrëveshje,” thuhet në reagimin zyrtar. /skyweb.al
