Franca ka kërkuar pezullimin për tre muaj të platformës kineze të shitjeve online Shein, për shkak të zbulimit të lodrave te seksit me pamje fëmijësh dhe armëve të ndaluara të shitura përmes saj. Lajmi u konfirmua nga një zyrtar i Ministrisë së Financave.
Pavarësisht se Shein mbylli seksionin e saj të shitësve të palëve të treta në Francë më 5 nëntor, pasi autoritetet gjetën produkte të paligjshme, pjesa tjetër e faqes e cila ofron artikuj të vetë kompanisë mbetet e aksesueshme. Për këtë arsye, qeveria franceze kërkon mbylljen e plotë të platformës në Francë nëpërmjet një procedure të përshpejtuar gjyqësore.
Seanca gjyqësore pritet të zhvillohet të mërkurën në Paris, ku është thirrur kompanija që menaxhon aktivitetin e Shein në Europë, Infinite Styles Services Co Ltd, si edhe operatorët kryesorë të internetit në Francë, të cilëve mund t’u kërkohet të bllokojnë aksesin në faqe.
Autoritetet franceze mbështeten në një ligj për ekonominë digjitale që i jep gjykatës së Parisit kompetenca për të pezulluar përmbajtjen online që konsiderohet e dëmshme. Zyrtarët shprehen se Shein ka kapacitetet teknologjike, përfshirë përdorimin e inteligjencës artificiale, për të monitoruar më mirë produktet e publikuara, por nuk e ka bërë këtë në mënyrë të mjaftueshme.
Vendimi përfundimtar për pezullimin e platformës pritet të merret në javët e ardhshme. Ndërkohë, Franca i ka kërkuar Komisionit Europian të nisë një hetim më të gjerë jo vetëm ndaj Shein, por edhe ndaj platformave të tjera si AliExpress, Joom, Wish dhe Temu për shkelje të ngjashme. /Skyweb.al
