Parlamenti Europian ka propozuar vendosjen e kufizimeve të reja për qasjen e fëmijëve nën 16 vjeç në mediat sociale, me qëllim rritjen e mbrojtjes së tyre në internet.
Gjatë seancës plenare, eurodeputetët miratuan një raport jolegjislativ me 483 vota pro, 92 kundër dhe 86 abstenime, në të cilin bëhet thirrje për masa më të forta për sigurinë online të të miturve.
Sipas njoftimit zyrtar, Parlamenti Evropian rekomandon përcaktimin e një moshe minimale uniforme prej 16 vjetësh për qasje në rrjetet sociale, platformat e shpërndarjes së videove dhe shoqëruesit e inteligjencës artificiale. Fëmijët e moshës 13–16 vjeç do të mund të kenë akses vetëm me pëlqimin e prindërve.
Eurodeputetët kërkojnë gjithashtu ndalimin e platformave që nuk respektojnë rregullat e BE-së, marrjen e masave kundër praktikave manipuluese si reklamat e synuara dhe marketingu përmes influencuesve, si dhe mbrojtjen e të miturve nga shfrytëzimi komercial. Po ashtu, raporti thekson nevojën për t’iu përgjigjur me urgjencë sfidave etike dhe ligjore të teknologjive gjeneruese të inteligjencës artificiale, duke përfshirë deepfake-t dhe chatbotët shoqërues. /Skyweb.al
