Shikimi i popullsisë globale po përballet me një rritje alarmante të problemeve, dhe parashikimet e Organizatës Botërore të Shëndetësisë tregojnë se brenda dy dekadash, gjysma e njerëzve në botë mund të jenë miope.
Edhe në Shqipëri, mënyra e jetesës së re ka ndikuar dukshëm te brezat e rinj. Qëndrimi i gjatë në ambiente të mbyllura – në shtëpi, shkollë apo zyrë – dhe përdorimi i pajisjeve elektronike kanë shtuar numrin e fëmijëve që kanë nevojë për syze. Ndryshe nga prindërit e tyre, shumë fëmijë po përballen me probleme shikimi që nuk lidhen me gjenetikën, por me mënyrën e jetesës.
Të dhënat nga programi i depistimit të shikimit në shkolla tregojnë se 23% e nxënësve të kontrolluar janë referuar për vizita të specializuara tek okulisti. Në qytete, problemet më të shpeshta janë miopia, strabizmi dhe syri dembel, ndërsa në zonat rurale numri i fëmijëve me shqetësime shëndetësore dhe me syze është më i ulët.
Okulistët këshillojnë që prindërit të kufizojnë kohën që fëmijët kalojnë para ekranit dhe të nxisin aktivitet jashtë shtëpisë, duke i dërguar sa më shpesh në shëtitje në natyrë.
